കൊച്ചി: സംവിധായകന്‍ രഞ്ജിത്ത് യുവനടിയെ പീഡിപ്പിക്കാന്‍ ശ്രമിച്ചെന്ന കേസില്‍ അന്വേഷണം വിപുലമാക്കും. നടിയുടെ ശരീരത്തില്‍ രഞ്ജിത്ത് കടന്നു പിടിച്ച സംഭവം നടന്നു എന്നു കരുതുന്ന കാരവാനില്‍ പൊലീസ് പരിശോധന നടത്തി.കാരവനുള്ളില്‍ സിസി ടിവി ഇല്ലാത്ത സാഹചര്യത്തില്‍ പുറത്തുള്ള സിസിടിവി ദൃശ്യങ്ങളും പരിശോധിക്കുമെന്ന് അന്വേഷണ സംഘം പറഞ്ഞു.
സിനിമയുടെ ചിത്രീകരണത്തിനായി വാടകയ്‌ക്ക് എടുത്തിട്ടുള്ളതാണ് കാരവാന്‍ എന്നാണ് വിവരം. രഞ്ജിത്ത് അറസ്റ്റിലാകുന്നതിനു മുമ്പ് സഞ്ചരിച്ചിരുന്ന വാഹനത്തിന്റെ ഉടമയും ഒപ്പമുണ്ടായിരുന്ന നടന്‍ ബോബി കുര്യന്‍, ചിത്രത്തിലെ സഹസംവിധായകന്‍, രഞ്ജിത്തിന്റെ മറ്റൊരു സഹായി എന്നിവരെയും അന്വേഷണസംഘം വിശദമായി ചോദ്യം ചെയ്യാനൊരുങ്ങുകയാണ്.
കൊച്ചി ഡിസിപി അശ്വതി ജിജിയുടെ മേല്‍നോട്ടത്തില്‍ ഉദയംപേരൂര്‍ ഇന്‍സ്പെക്ടര്‍ക്കാണ് അന്വേഷണച്ചുമതല.അന്വേഷണസംഘത്തില്‍ രണ്ട് വനിതാ എസ്ഐമാരും ഉണ്ട് . കഴിഞ്ഞ ജനുവരി 30ന് ഷൂട്ടിംഗ് സ്ഥലത്തെ കാരവാനില്‍ വച്ച് രഞ്ജിത്ത് കയറിപ്പിടിക്കാന്‍ ശ്രമിച്ചു എന്നാണ് യുവനടിയുടെ പരാതി. നടി കരഞ്ഞുകൊണ്ട് കാരവാനില്‍ നിന്ന് ഇറങ്ങിവരുന്നത് ചിത്രീകരണ സ്ഥലത്തുണ്ടായിരുവന്നവര്‍ കണ്ടിരുന്നു എന്നാണ് വിവരം.
എറണാകുളം സബ് ജയിലില്‍ കഴിയുന്ന രഞ്ജിത്തിനെ കസ്റ്റഡിയില്‍ കിട്ടാനുള്ള പൊലീസിന്റെ അപേക്ഷയും പ്രതിയുടെ ജാമ്യാപേക്ഷയും കോടതി ശനിയാഴ്ച പരിഗണിക്കും.
