പത്തനംതിട്ട: പൈങ്കുനി ഉത്രം നാളില് അയ്യപ്പ ഭഗവാന് പമ്പയില് ആറാട്ട്. ഇന്നലെ രാവിലെ ഒന്പതിന് ആറാട്ട് ഘോഷയാത്ര സന്നിധാനത്ത് നിന്ന് പമ്പയിലേക്ക് പുറപ്പെട്ടു.
ഗജവീരന് വെളിനല്ലൂര് മണികണ്ഠന് ഭഗവാന്റെ തിടമ്പേറ്റി. 11.30ന് പമ്പയില് എത്തിച്ചേര്ന്ന ഘോഷയാത്രയെ തിരുവിതാംകൂര് ദേവസ്വം ബോര്ഡ് അംഗങ്ങളായ അഡ്വ. പി.ഡി. സന്തോഷ് കുമാര്, അഡ്വ. കെ. രാജു, സംസ്ഥാന പോലീസ് മേധാവി റവാഡാ ചന്ദ്രശേഖര്, ശബരിമല സ്പെഷല് കമ്മിഷണര് ജയകൃഷ്ണന്, തിരുവിതാംകൂര് ദേവസ്വം ബോര്ഡ് കമ്മിഷണര് ബി. സുനില്കുമാര്, സെക്രട്ടറി പി.എന്. ഗണേശ്വരന് പോറ്റി, ശബരിമല പോലീസ് ചീഫ് കോഡിനേറ്റര് എസ്. ശ്രീജിത്ത് എന്നിവര് ചേര്ന്ന് വരവേറ്റു. ഉച്ചയ്ക്ക് 12.20 നാണ് പമ്പയിലെ ഭഗവാന്റെ ആറാട്ട് ചടങ്ങ് നടന്നത്. തന്ത്രി കണ്ഠര് മഹേഷ് മോഹനര്, മേല്ശാന്തി ഇ.ഡി. പ്രസാദ് എന്നിവര് ചടങ്ങുകള്ക്ക് കാര്മികത്വം വഹിച്ചു.
ആറാട്ടിനു ശേഷം പമ്പാ ഗണപതി ക്ഷേത്രത്തില് ഭഗവാനു മുന്നില് ഭക്തര് പറ സമര്പ്പിച്ചു. ആയിരക്കണക്കിന് ഭക്തരാണ് ആറാട്ട് കണ്ട് ദര്ശന പുണ്യം നേടിയത്. ആറാട്ട് ഘോഷയാത്ര സന്നിധാനത്ത് തിരികെ എത്തിയതോടെ 10 ദിവസത്തെ ഉത്സവത്തിന് കൊടിയിറങ്ങി. രാത്രി പത്തിന് നടയടച്ചു.
