തൃശൂര്: പ്രധാനമന്ത്രി നരേന്ദ്ര മോദിയുടെ സന്ദര്ശനത്തിന്റെ പശ്ചാത്തലത്തില് തൃശൂര് നഗരത്തില് ഞായറാഴ്ച കര്ശന സുരക്ഷാ ക്രമീകരണം ഏര്പ്പെടുത്തി. രാവിലെ 11 മുതല് വൈകുന്നേരം 6.30 വരെ ഗതാഗത നിയന്ത്രണം ഉണ്ടാകും.
പ്രധാനമന്ത്രിയുടെ സന്ദര്ശന മേഖലകളില് ഡ്രോണ് ഉപയോഗത്തിനു സമ്പൂര്ണ നിരോധനം ഉണ്ടാകും. പശ്ചിമേഷ്യന് സംഘര്ഷം കൂടി കണക്കിലെടുത്താണ് കര്ശന സുരക്ഷയൊരുക്കാനുള്ള തീരുമാനം.
അത്യാവശ്യങ്ങള്ക്കൊഴികെ സ്വകാര്യ വാഹനങ്ങളില് എത്തുന്നത് പൊതുജനം ഒഴിവാക്കണം.വൈകുന്നേരം പ്രധാനമന്ത്രിയുടെ റോഡ് ഷോ കഴിയും വരെ സ്വരാജ് റൗണ്ട്, സമീപ റോഡുകള്, വടക്കുന്നാഥ ക്ഷേത്ര പരിസരം എന്നിവിടങ്ങളില് പാര്ക്കിംഗ് അനുവദിക്കില്ല.
കുട്ടനെല്ലൂര് ഹെലിപാഡ് മുതല് നടത്തറ, മണ്ണുത്തി, തൃശൂര് റോഡിന്റെ ഇരുവശത്തും പാര്ക്കിംഗ് നിരോധിച്ചു. മുനിസിപ്പല് ഓഫീസ് റോഡ്, കുറുപ്പം റോഡ്, നടുവിലാല്, ഷൊര്ണൂര് റോഡ്, പ്രസ് ക്ലബ് റോഡ് എന്നിവിടങ്ങളിലൂടെ മാത്രമാണ് പൊതുജനത്തിന് പ്രവേശനം അനുവദിച്ചിട്ടുളളത്.പേന, ബാഗ്, വെള്ളം കുപ്പികള് തുടങ്ങിയവ സ്വരാജ് റൗണ്ടിലേക്ക് പ്രവേശിപ്പിക്കില്ല.
