കൊടുങ്ങല്ലൂര്‍ ഭരണിയ്‌ക്കെത്തിയ സ്പെയിന്‍കാരി കോമരമായി തുള്ളി; പ്രചണ്ഡയായ ഭഗവതി ആ മെയ്യിലും മനസ്സിലും കയറി നൃത്തം ചെയ്തിരിക്കാമെന്ന് വി.കെ. ശ്രീരാമന്‍

കൊടുങ്ങല്ലൂര്‍: കൊടുങ്ങല്ലൂർ ഭർണി പകര്‍ത്താന്‍ എത്തിയ വ്ളോഗറായ സ്പെയിന്‍കാരിയുടെ  ശരീരത്തിലേക്ക് ഭരണിച്ചടങ്ങുകള്‍ക്കിടയില്‍ ‘കൊടുങ്ങല്ലൂര്‍ ഭഗവതി ‘  കയറിയതോടെ ഉറഞ്ഞുതുള്ളി. ദിവ്യമായ കൊടുങ്ങല്ലൂരമ്മയുടെ ശക്തി വെറും കെട്ടുകഥയല്ല, മിത്തല്ല എന്നെല്ലാമുള്ള അടിക്കുറിപ്പോടെ ഇതിന്റെ വീഡിയോ സമൂഹമാധ്യമങ്ങളില്‍ ലോകമെങ്ങും വൈറലായി പ്രചരിക്കുകയാണ്. ഭരണിച്ചടങ്ങുകളുടെ ഭാഗമായി വന്യമായ താളങ്ങളും പാട്ടും മുറുകിയപ്പോഴാണ് അറിയാതെ നിത്യാശ്രീ പൗള സെഗാര എന്ന പേരുള്ള ഈ സ്പെയിന്‍കാരിയും ശരീരത്തില്‍ ശക്തിയാവേശിച്ചതോടെ ഉറഞ്ഞ് തുള്ളുകയും പിന്നീട് തറയില്‍ വിരിച്ച ചെമ്പട്ടില്‍ വീണ് വന്യമായ അലര്‍ച്ചകളോടെ ഉരുളുകയും ചെയ്തത്. ഇത് കാണികളെ ഒരു നിമിഷം അമ്പരപ്പിലാഴ്‌ത്തി. പിന്നീട് ഇത് പരാശക്തി ശരീരത്തില്‍ ആവേശിച്ചതാണെന്ന് എല്ലാവരും തിരിച്ചറിഞ്ഞു. അല്‍പനേരത്തിന് ശേഷം അവര്‍ ശാന്തയായി.

🚩From human to Goddess Shakti😍
The Spanish-speaking YouTuber who came to take a video of #Bharani rituals @ Kerala’s famous Bhadrakali Kshetram in Kodungallur gets transported to her abode.
Our ancient faith,our rituals, our #SanatanaDharma – is indestructible 🙏#AmmeSharanam pic.twitter.com/gcBriCQa5Z

— 🇮🇳 Sangitha Varier 🚩 (@VarierSangitha) March 23, 2026

ഇതോടെ ‘അമ്മപരാശക്തി’ എന്ന ശക്തിക്ക് ഭാഷയോ ദേശഭേദങ്ങളോ ഇല്ലെന്ന സത്യമാണ് തെളിയുന്നത്. ഭരണിച്ചടങ്ങുകള്‍ കണ്ടുകൊണ്ട് ശാന്തയായി അത് ക്യാമറയില്‍ പകര്‍ത്തിക്കൊണ്ടിരിക്കുകയായിരുന്നു. പക്ഷെ ചുറ്റും കൂടിനില്‍ക്കുന്നവര്‍ വന്യമായി പാടുകയും ഭ്രാന്തമായ താളത്തിനൊത്ത് ചുവടുവെയ്‌ക്കുകയും ചെയ്തതോടെ ഇവരുടെ ശരീരത്തിലേക്ക് കൊടുങ്ങല്ലൂരമ്മ ആവേശിക്കുകയായിരുന്നു. ഇതോടെയാണ് സ്പെയിന്‍കാരിയായ നിത്യാ ശ്രീ പൗള സെഗാര ഉറഞ്ഞുതുള്ളിയത്. പിന്നീട് അവര്‍ അമ്മ പരാശക്തി ദേഹത്തില്‍ ആവേശിച്ചതുപോലെ ഉറക്കെ ശബ്ദിച്ച് കൈകാലുകള്‍ നിലത്ത് തല്ലി വല്ലാതെ ഉറഞ്ഞുതുള്ളുകയായിരുന്നു. ഈ അനുഭവം നന്നായി അറിയുന്നവര്‍ അവരുടെ വന്യമായ ശരീരചലനം അല്‍പം ശാന്തമാകുന്നത് കാത്തിരുന്നു. പിന്നീട് അവര്‍ കുടിക്കാന്‍ വെള്ളം കൊടുത്തു. അല്‍പനേരത്തിന് ശേഷം ദേഹത്ത് നിന്നും ശക്തി ഇറങ്ങിപ്പോയതോടെ അവര്‍ പഴയ പടി ശാന്തയായി.

ചുവന്ന സാരിയുടുത്തു തന്നെയാണ് അവര്‍ ഭരണിയുത്സവം കാണാന്‍ കൊടുങ്ങല്ലൂരില്‍ എത്തിയത്. ഇവരുടെ പ്രചണ്ഡനൃത്തം സമൂഹമാധ്യമങ്ങളില്‍ കണ്ട എഴുത്തുകാരന്‍ വി.കെ. ശ്രീരാമന്‍ ഇതിനോട് പ്രതികരിച്ചത് ഇങ്ങിനെ:”ചെമ്പട്ടുടുത്ത് കൊടുങ്ങല്ലൂര്‍ ഭരണി ചിത്രീകരണത്തിനെത്തിയതാണത്രെ ഈ സ്പാനിഷ് വ്ളോഗര്‍. പ്രചണ്ഡയായ ഭഗവതി ആ മെയ്യിലും മനസ്സിലും പാഞ്ഞുകയറി നൃത്തം ചെയ്തിരിക്കാം.”

എല്ലാ വര്‍ഷത്തേയും പോലെ ഈ വര്‍ഷവും കൊടുങ്ങല്ലൂര്‍ ക്ഷേത്രത്തിലെ വാർഷിക ഭരണി ഉത്സവം അനുഭവിക്കാൻ എത്തിയതായിരുന്ന സ്പെയിന്‍ കാരി. ഈ സ്പെയിന്‍കാരിയെക്കുറിച്ച് സമൂഹമാധ്യമങ്ങളില്‍ അന്വേഷണം നിറഞ്ഞതോടെ ഉത്തരങ്ങളും വന്നു. ഇവര്‍ നേരത്തെ തന്നെ ഭാരതീയ സംസ്കാരത്തോടും ആത്മീയതയോടും അടുപ്പം പുലര്‍ത്തുന്നവരാണ് എന്ന് മാത്രമല്ല, ഇവരുടെ പേര് തന്നെ നിത്യാശ്രീ പൗള സെഗാര എന്നതാണ്. പൗള സെഗാര എന്ന ഒറിജിനല്‍ പേരിനൊപ്പം നിത്യാശ്രീ എന്ന ഭാരതീയ നാമം കൂടി ചേര്‍ത്തിരിക്കുകയാണ്. സനാതന ധര്‍മ്മത്തിലും ഹൈന്ദവ ആചാരങ്ങളിലും പ്രത്യേകതാല‍്പര്യം ഉള്ളവരാണ് ഈ സ്പെയിന്‍ കാരി.