ന്യൂദൽഹി: പശ്ചിമേഷ്യൻ പ്രതിസന്ധിയിൽ പ്രധാനമന്ത്രി നരേന്ദ്ര മോദിയെയും കേന്ദ്ര സർക്കാരിന്റെ സമാധാന ശ്രമങ്ങളെയും വാനോളം പുകഴ്‌ത്തി കോൺഗ്രസ് എംപി ശശി തരൂർ. പശ്ചിമേഷ്യയിൽ നടന്നുകൊണ്ടിരിക്കുന്ന സംഘർഷം അവസാനിപ്പിക്കാൻ ലോകം മുഴുവൻ കൂട്ടായ ശ്രമങ്ങൾ നടത്തേണ്ടിവരുമെന്നും ഇന്ത്യ ഇതിൽ നേതൃപരമായ പങ്ക് വഹിക്കണമെന്നും ശശി തരൂർ പറഞ്ഞു.
പാർലമെന്റ് വളപ്പിൽ മാധ്യമപ്രവർത്തകരുടെ ചോദ്യങ്ങൾക്ക് മറുപടി നൽകവേ ഇന്ത്യൻ സർക്കാർ നടത്തുന്ന ശ്രമങ്ങളെക്കുറിച്ച് കോൺഗ്രസ് എംപി വാചാലനായി. ” സമാധാന ശ്രമങ്ങൾക്കായി ഇന്ത്യ ചില മുൻകൈകൾ സ്വീകരിക്കുന്നതിൽ എനിക്ക് സന്തോഷമുണ്ട്… ഈ സമയത്ത്, ഒരു പക്ഷവും വഴങ്ങാൻ തയ്യാറല്ല… ഇറാനികൾ ധാരാളം പ്രതികാര നടപടികളെക്കുറിച്ച് സംസാരിക്കുമ്പോൾ, ലക്ഷ്യം വളരെ വേഗം പൂർത്തിയാക്കുന്നതിലേക്ക് നീങ്ങുകയാണെന്ന് ട്രംപ് പറയുന്നു… ദൽഹിയിൽ ഇരുന്ന് നമുക്ക് ഒന്നും വിലയിരുത്താൻ വളരെ ബുദ്ധിമുട്ടാണ്. ” – തരൂർ പറഞ്ഞു.
സമാധാന ശ്രമങ്ങളിൽ ഇന്ത്യ ഒരു പ്രധാന പങ്ക് വഹിക്കണം
” നമ്മൾ സമാധാനത്തിനായുള്ള ഒരു പോസിറ്റീവ് ശബ്ദമായിരിക്കണമെന്ന് ഞങ്ങൾ വിശ്വസിക്കുന്നു. ഗൾഫ് രാജ്യങ്ങളിലെ 9 ദശലക്ഷം ഇന്ത്യക്കാരുടെ സുരക്ഷയും നമ്മുടെ ബന്ധങ്ങളും അപകടത്തിലാണ്. ഇത് തടയാൻ കൂട്ടായി ശ്രമിക്കേണ്ടത് മുഴുവൻ ലോകത്തിന്റെയും താൽപ്പര്യമാണ്, ഈ വിഷയത്തിൽ നമ്മുടെ ശബ്ദം പ്രധാനമായിരിക്കണം.” – തരൂർ കൂട്ടിച്ചേർത്തു.
അതേ സമയം നേരത്തെ ഇറാൻ പ്രസിഡന്റ് മസൂദ് പെഷേഷ്കിയാൻ ഉൾപ്പെടെ നിരവധി ഗൾഫ് രാജ്യങ്ങളുടെ തലവന്മാരുമായി പ്രധാനമന്ത്രി മോദി അടുത്തിടെ അവിടത്തെ സ്ഥിതിഗതികളെക്കുറിച്ച് സംസാരിച്ചു. വിദേശകാര്യ മന്ത്രി എസ്. ജയശങ്കറും ഇറാൻ വിദേശകാര്യ മന്ത്രിയുമായി നാല് തവണ ചർച്ചകൾ നടത്തിയിട്ടുണ്ട്.
