സ്വന്തം രാഷ്‌ട്രീയ താൽപ്പര്യങ്ങൾക്കായി ദശലക്ഷക്കണക്കിന് ദൽഹി നിവാസികളുടെ പദ്ധതികൾ എഎപി തടഞ്ഞുവച്ചു : ആം ആദ്മി പാർട്ടിയെ വിമർശിച്ച് പ്രധാനമന്ത്രി

ന്യൂദൽഹി : ആം ആദ്മി പാർട്ടിയെ ലക്ഷ്യമിട്ട് പ്രധാനമന്ത്രി മോദി.
കുറച്ചുമാത്രം കാര്യങ്ങൾ ചെയ്ത് കൂടുതൽ ഒഴികഴിവുകൾ പറയുക എന്നതായിരുന്നു അവരുടെ ജനങ്ങളോടുള്ള സമീപനമെന്ന് പ്രധാനമന്ത്രി മോദി തുറന്നടിച്ചു. എന്നാൽ ഇന്ന് ദൽഹി വികസനത്തിന്റെ ഒരു മാതൃകയാണ്: ഒഴികഴിവുകളില്ല, ജോലികൾ ആരംഭിക്കുന്നു. മുമ്പ് പദ്ധതികൾ ഫയലുകളിൽ തന്നെ ഒതുങ്ങുമായിരുന്നു, എന്നാൽ ഇന്ന് അവ നിലത്തുതന്നെ നടപ്പാക്കപ്പെടുന്നുവെന്നും മോദി പറഞ്ഞു.

മാർച്ച് 8 ന് വനിതാ ദിനത്തോടനുബന്ധിച്ച് ഏകദേശം 33,500 കോടി രൂപയുടെ പ്രധാന വികസന പദ്ധതികളുടെ ഉദ്ഘാടനവും തറക്കല്ലിടലും നിർവഹിച്ച് കൊണ്ട് സംസാരിക്കുകയായിരുന്നു അദ്ദേഹം. ഒരു വർഷം മുമ്പ് ദൽഹി, ആം ആദ്മി സർക്കാരിൽ നിന്ന് മോചിതരാകേണ്ടതിന്റെ ആവശ്യകത എത്രത്തോളം ഉണ്ടായിരുന്നു എന്നതിന്റെ തെളിവാണ് ഇന്നത്തെ പരിപാടിയെന്ന് പ്രധാനമന്ത്രി നരേന്ദ്ര മോദി പറഞ്ഞു.

ആം ആദ്മി സർക്കാർ അധികാരത്തിലില്ലായിരുന്നുവെങ്കിൽ, മെട്രോ ഫേസ് 4 പദ്ധതി വളരെ മുമ്പുതന്നെ പൂർത്തിയാകുമായിരുന്നു,  എന്നാൽ സ്വന്തം രാഷ്‌ട്രീയ താൽപ്പര്യങ്ങൾക്കായി ദശലക്ഷക്കണക്കിന് ദൽഹി നിവാസികളുടെ സൗകര്യം എഎപി അവഗണിച്ചു. ബിജെപി സർക്കാർ അധികാരത്തിൽ വന്നതിനുശേഷം, ദൽഹിയുടെ സമഗ്ര വികസനം ത്വരിതഗതിയിലായിയെന്നും അദ്ദേഹം കൂട്ടിച്ചേർത്തു.