തിരുവനന്തപുരം: തളിപ്പറമ്പ് മണ്ഡലത്തില്‍ പികെ ശ്യാമള മത്സരിക്കുന്നതില്‍ മുറുമുറുപ്പ് ഉയര്‍ന്ന പശ്ചാത്തലത്തില്‍ ന്യായീകരണവുമായി സിപിഎം സംസ്ഥാന സെക്രട്ടറി എംവി ഗോവിന്ദന്‍. താന്‍ വിവാഹം കഴിക്കും മുമ്പേ ശ്യാമള പാര്‍ട്ടി പദവികളില്‍ സജീവമാണെന്നും തന്റെ ഭാര്യ എന്നത് ഇപ്പോള്‍ പൊട്ടിമുളച്ചത് എങ്ങനെയെന്നും സംസ്ഥാന സമിതിയില്‍ അദ്ദേഹം ചോദിച്ചു.
ശ്യാമളയെ സ്ഥാനാര്‍ഥിയാക്കാനുളള നീക്കത്തില്‍ സൈബര്‍ രംഗത്തെ വിമര്‍ശനങ്ങള്‍ സംസ്ഥാന സമിതിയില്‍ ഉന്നയിച്ചതിനായിരുന്നു എംവി ഗോവിന്ദന്റെ മറുപടി.തന്റെ ഭാര്യ എന്നത് ഇപ്പോള്‍ പൊട്ടിമുളച്ചത് എങ്ങനെ എന്ന് എംവി ഗോവിന്ദന്‍ ചോദിച്ചു.തളിപ്പറമ്പില്‍ പുനരാലോചനയില്ല.
മുന്‍ മന്ത്രിയും മുതിര്‍ന്ന നേതാവുമായ ജി സുധാകരന്റെ അതൃപ്തി മാറ്റണമെന്ന് സംസ്ഥാന സമിതി നിര്‍ദേശിച്ചു.ഇതിനായി നേതൃതലത്തില്‍ ഇടപെടല്‍ തുടരും.
അതേസമയം,നിയമസഭാ തിരഞ്ഞെടുപ്പിനുളള സിപിഎം സ്ഥാനാര്‍ഥി പട്ടികയ്ക്ക് അന്തിമരൂപമായി. നിലവിലെ എംഎല്‍എമാരാണ് നല്ലൊരു ശതമാനവും.പൊളിറ്റ് ബ്യൂറോയില്‍ നിന്ന് പിണറായി വിജയന്‍ കേന്ദ്ര കമ്മിറ്റിയില്‍ നിന്ന് കെ.കെ.ശൈലജ, ടി.പി രാമകൃഷ്ണന്‍, കെ.എന്‍.ബാലഗോപാല്‍, പി.രാജീവ് എന്നിവരും സംസ്ഥാന സെക്രട്ടേറിയേറ്റില്‍ നിന്ന് വി.എന്‍.വാസവനും സജി ചെറിയാനും പി.എ
മുഹമ്മദ് റിയാസും മത്സരിക്കും. കാസര്‍കോട് ജില്ലയിലെ ഉദുമയില്‍ സി.എച്ച് കുഞ്ഞമ്പു ജനവിധി തേടും.തൃക്കരിപ്പൂരില്‍ വിപിപി മുസ്തഫ മത്സരിക്കും.തളിപ്പറമ്പില്‍ പി.കെ.ശ്യാമളയും തലശേരിയില്‍ കാരായി രാജനും മത്സരിക്കും. മട്ടന്നൂരില്‍ വി.കെ.സനോജാണ് സ്ഥാനാര്‍ത്ഥി.പേരാവൂരില്‍ കെ.കെ ശൈലജ, വയനാട് മാനന്തവാടിയില്‍ ഒ.ആര്‍.കേളു, ബത്തേരിയില്‍ വിശ്വനാഥന്‍ എന്നിവര്‍ സ്ഥാനാര്‍ത്ഥികളാകും. കോഴിക്കോട് ജില്ലയിലെ പേരാമ്പ്രയില്‍ ടിപി രാമകൃഷ്ണനാണ് മത്സരിക്കുക.ബേപ്പൂരില്‍ മുഹമ്മദ് റിയാസും കൊയിലാണ്ടിയില്‍ കെ.ദാസനും സ്ഥാനാര്‍ത്ഥിയാകും. കൊടുവളളിയില്‍ സ്വതന്ത്രനെ പരീക്ഷിക്കും.
മലപ്പുറം ജില്ലയിലെ പൊന്നാനിയില്‍ എം.കെ.സക്കീര്‍ സ്ഥാനാര്‍ത്ഥിയാകും.തവനൂരില്‍ കെ.ടി.ജലീലും മത്സരിക്കും. പെരിന്തല്‍മണ്ണ, മങ്കട നിലമ്പൂര്‍ സീറ്റുകളില്‍ പൊതു സ്വതന്ത്രനെ തേടുന്നു. പാലക്കാട് ജില്ലയിലെ തൃത്താലയില്‍ മന്ത്രി എം.ബി.രാജേഷ് വീണ്ടും ജനവിധി തേടും.ഷൊര്‍ണൂരില്‍ പി മമ്മിക്കുട്ടിയും ഒറ്റപ്പാലത്ത് പ്രേംകുമാറും മലമ്പുഴയില്‍ എ.പ്രഭാകരനും തുടരും.നെന്മാറയില്‍ കെ.പ്രേമന്‍ സ്ഥാനാര്‍ത്ഥിയാകും.ആലത്തൂരില്‍ ജില്ലാ സെക്രട്ടറിയേറ്റ് അംഗം ടി.എം. ശശി മത്സരിക്കും.
പാലക്കാട് യുഡിഎഫ് സ്ഥാനാര്‍ത്ഥി ആരെന്ന് അറിഞ്ഞശേഷമാകും സ്ഥാനാര്‍ത്ഥിയെ നിശ്ചയിക്കുക. തൃശൂര്‍ കുന്ദംകുളത്ത് എ.സി.മൊയ്തീനാകും മത്സരിക്കുക.വടക്കാഞ്ചേരിയില്‍ സേവ്യര്‍ ചിറ്റിലപ്പളളി ഇറങ്ങുമ്പോള്‍ ഇരിങ്ങാലക്കുടയില്‍ ആര്‍.ബിന്ദുവും പുതുക്കാട് രാമചന്ദ്രനും തന്നെയാകും മത്സരിക്കുക.മണലൂരില്‍ മുന്‍ മന്ത്രി സി. രവീന്ദ്രനാഥ് ഇറങ്ങും.
