മട്ടാഞ്ചേരി: വര്ണപ്പൊടികളും നിറങ്ങള് കലക്കിയ വെള്ളവും പരസ്പരം കോരിയെറിഞ്ഞുള്ള ‘ഹോളി’ ആഘോഷം കൊച്ചിയുടെ തെരുവീഥികളെ ആഹ്ലാദത്തിമിര്പ്പിലാക്കി. നഗര-ഗ്രാമ വ്യത്യാസമന്യെ ഉത്തരഭാരത സമൂഹത്തോടൊപ്പം മലയാളികളും വര്ണങ്ങളുടെ ആഘോഷത്തില് പങ്കെടുത്തു. ഫാല്ഗുന മാസ പൗര്ണമി നാളില് രാക്ഷസരൂപി ഹോളികയെ അഗ്നിക്കിരയാക്കുന്നതിന്റെ പ്രതീകമായുള്ള ചടങ്ങുകള്ക്ക് ശേഷമാണ് ഹോളി ആഘോഷം നടന്നത്.
അധര്മ്മിയായ ഹോളികയുടെ നാശവും ധര്മപ്രതീകമായ ഭക്തപ്രഹ്ലാദന്റെ വിജയവും ചേര്ത്തുള്ള ആഹ്ലാദോത്സവമാണ് ഹോളി. പരമ്പരാഗത അനുഷ്ഠാനങ്ങള്ക്കൊപ്പം ആധുനികതയുടെ സാമൂഹിക കൂട്ടായ്മയും പ്രകടമാക്കി ഹോളിയാഘോഷം ജനകീയമായിക്കഴിഞ്ഞു. ഉത്തരഭാരത സമൂഹം ഏറെയുള്ള കൊച്ചി, ആലപ്പുഴ, കോഴിക്കോട്, പാലക്കാട് തുടങ്ങിയയിടങ്ങളിലാണ് വര്ണങ്ങളുടെ ആഘോഷം സജീവമാകുന്നത്.
പൈതൃക വാണിജ്യ നഗരികളിലെ ഹോളി ആഘോഷങ്ങളില് ദേശ, ഭാഷാ, വ്യത്യാസമന്യേയുള്ള ജനകീയ സാന്നിധ്യം ഏറെ ശ്രദ്ധേയമാണ്. ഹോളിയില് പങ്കെടുക്കുവാന് അന്യദേശങ്ങളില് നിന്നടക്കം ആളുകള് നാട്ടിലെത്തുന്നു.
ഉത്തര ഭാരതീയരും കൊങ്കണി, കന്നഡ ദേശക്കാരും മലയാളി സമാജങ്ങളും ആഘോഷ ലഹരിയിലമരും. ഗുജറാത്തി റോഡ്, പാലസ് റോഡ്, ചെറളായി അമരാവതി, ദ്രോണാചാര്യ, മുണ്ടംവേലി, നേവല് ബേസ്, കഠാരിബാഗ്, ടിഡി റോഡ് തുടങ്ങി വിവിധ കേന്ദ്രങ്ങളിലും അന്യസംസ്ഥാന തൊഴിലാളി കേന്ദ്രങ്ങളിലും ഹോളിയാഘോഷം വിപുലമായി കൊണ്ടാടി. ഫോര്ട്ടുകൊച്ചി, മട്ടാഞ്ചേരി മേഖലയിലെ ഹോളിയാഘോഷങ്ങളില് വിദേശ വിനോദസഞ്ചാരികളും പങ്കെടുത്തു.
