ദുബായ് : ഗള്ഫ് രാജ്യങ്ങളിലെ സംഭവ വികാസങ്ങളില് അനാവശ്യ പ്രചാരണങ്ങള് നടത്തരുത് എന്ന് വ്യവസായി എം എ യൂസഫലി. മാധ്യമങ്ങളെ സര്ക്കാര് സൂക്ഷ്മമായി നിരീക്ഷിക്കുന്നുണ്ട്. മലയാള മാധ്യമങ്ങള് ‘ആക്രമണോത്സുകത’ കാട്ടുന്നത് സംബന്ധിച്ച് അധികൃതര് ആരാഞ്ഞുവെന്നും യൂസഫലി പറഞ്ഞു. നിര്ദേശങ്ങള് പാലിച്ചില്ലെങ്കില് വിലക്ക് നേരിടേണ്ടി വരും.
ഈ വേളയില് ഇല്ലാത്ത കാര്യങ്ങള് ഉണ്ടാക്കിപ്പറയലും ആവശ്യമില്ലാത്ത എഐ നിര്മിത വിഡിയോ പ്രചരിപ്പിക്കലും സ്ഥിരീകരിക്കാത്ത വാര്ത്തകള് റിപ്പോര്ട്ട് ചെയ്യുന്ന പ്രവണതയും അവസാനിപ്പിക്കണമെന്ന് യൂസഫലി പറഞ്ഞു. വാട്സ്ആപ്പിലും ചില ഓണ്ലൈന് മാധ്യമങ്ങളിലും ധാരാളം അനാവശ്യ വാര്ത്തകള് വരുന്നുണ്ട്. സംഘര്ഷത്തിനിടെ മാധ്യമങ്ങള് ഉറപ്പില്ലാത്ത കാര്യം പ്രചരിപ്പിക്കുന്നത് എല്ലാവര്ക്കും ബുദ്ധിമുട്ടുണ്ടാക്കും.
ഗള്ഫ് ഭരണകൂടങ്ങള് വാര്ത്തകളെ കൃത്യമായി നിരീക്ഷിക്കുന്നുണ്ടെന്ന് യൂസഫലി ഓര്മിപ്പിച്ചു. അസത്യ പ്രചരണം നടത്തിയാല് കടുത്ത നടപടിയാകും ഭരണകൂടങ്ങള് സ്വീകരിക്കുകയെന്നും അദ്ദേഹം പറഞ്ഞു.
