മധുര: വികസിത ഭാരതത്തിനായി വികസിത തമിഴ്നാട് എന്ന ലക്ഷ്യത്തിലൂന്നിയാണ് കേന്ദ്രസര്‍ക്കാര്‍ മുന്നോ ട്ടുപോകുന്നതെന്ന് പ്രധാനമന്ത്രി നരേന്ദ്രമോദി. മധുരയില്‍ 4,400 കോടിയിലധികം രൂപയുടെ അടിസ്ഥാന സൗകര്യ പദ്ധതികളുടെ ഉദ്ഘാടനം, തറക്കല്ലിടല്‍ എന്നിവ നിര്‍വഹിച്ച് സംസാരിക്കുകയായിരുന്നു അദ്ദേഹം.
സംസ്ഥാനത്തിന്റെ സമഗ്രവികസനവും പുരോഗതിയും സാധ്യമാക്കുന്നതിന് കേന്ദ്രം പൂര്‍ണമായും പ്രതിജ്ഞാ ബദ്ധമാണെന്ന് പ്രധാനമന്ത്രി പറഞ്ഞു. 2047 ആകുമ്പോഴേക്കും ഒരു വികസിത രാഷ്‌ട്രം കെട്ടിപ്പടുക്കാന്‍ ഓരോ ഭാരതീയനും പ്രചോദനം ഉള്‍ക്കൊണ്ടിരിക്കുന്നു. രാജ്യത്തിന്റെ വിധി രൂപപ്പെടുത്തുന്ന തില്‍ തമിഴ്നാട് നിര്‍ണായക പങ്ക് വഹിക്കും. റോഡ്, റെയില്‍ ഉള്‍പ്പെടെയുള്ള മേഖലകളില്‍ കേന്ദ്രം സംസ്ഥാനത്ത് നടത്തിയ കോടിക്കണക്കിന് രൂപയുടെ പദ്ധതികള്‍ അക്കമിട്ട് നിരത്തിയായിരുന്നു പ്രധാനമന്ത്രിയുടെ പ്രസംഗം.
തമിഴ്നാടിന് സമ്പന്നമായ ചരിത്രമുണ്ടെന്നും ആദിച്ചനല്ലൂര്‍ പോലുള്ള ചരിത്ര പ്രധാന്യമുള്ള സ്ഥലങ്ങളെ ആഗോള പൈതൃക കേന്ദ്രങ്ങളായി വികസിപ്പിക്കുമെന്ന് പ്രധാനമന്ത്രി പറഞ്ഞു. പുലിക്കട്ട് തടാകത്തിനും പൊതിഗൈ മലയ്‌ക്കും ചുറ്റുമുള്ള ഇക്കോടൂറിസം സംരംഭങ്ങള്‍ പ്രകൃതിദത്ത ആവാസ വ്യവസ്ഥയെ സംരക്ഷിക്കുന്നതിനൊപ്പം പുതിയ തൊഴിലവസരങ്ങള്‍ സൃഷ്ടിക്കുമെന്നും അദ്ദേഹം പറഞ്ഞു.
വണക്കം, പവിത്രവും ചരിത്രപരവുമായ മധുര നഗരത്തില്‍ എത്തിയതില്‍ അഭിമാനമുണ്ട് എന്ന് പറഞ്ഞാണ് പ്രധാനമന്ത്രി പ്രസംഗം ആരംഭിച്ചത്. മീനാക്ഷി അമ്മനെയും ഭഗവാന്‍ സുന്ദരേശ്വരനെയും വണങ്ങുന്നതായും പ്രധാനമന്ത്രി പറഞ്ഞു. തമിഴ്നാട് ഗവര്‍ണര്‍ ആര്‍.എന്‍. രവി, കേന്ദ്രമന്ത്രി എല്‍. മുരുകന്‍, എടപ്പാടി പളനിസ്വാമി, ബിജെപി സംസ്ഥാന പ്രസിഡന്റ് നൈനാര്‍ നാഗേന്ദ്രന്‍ എംഎല്‍എ, ഇ.വി. വേലു എന്നിവരും ചടങ്ങില്‍ പങ്കെടുത്തു.
