ആലപ്പുഴ: ഇടതുപക്ഷ ഭരണത്തില്‍ ജനങ്ങളും തൊഴിലാളികളും പൊറുതിമുട്ടി നില്‍ക്കുമ്പോള്‍ പരമ്പരാഗത വ്യവസായങ്ങളെ ഇല്ലായ്‌മ ചെയ്യാനുള്ള പിണറായി സര്‍ക്കാരിന്റെ ബോധപൂര്‍വ്വമായ നീക്കത്തെ ചെറുത്തു തോല്‍പിക്കണമെന്ന് ബിഎംഎസ് സംസ്ഥാന പ്രസിഡന്റ് ബി. ശിവജി സുദര്‍ശനന്‍ പറഞ്ഞു. വിദേശമദ്യശാലകള്‍ വ്യാപകമായി തുറന്ന് പ്രവര്‍ത്തിപ്പിക്കുന്ന നയപരിപാടികളുമായി പോകുന്ന സര്‍ക്കാര്‍ പരമ്പരാഗത കള്ളുചെത്ത് വ്യവസായത്തെ തകര്‍ത്ത് ഈ വിഭാഗം തൊഴിലാളികളെ തൊഴില്‍രഹിതരാക്കുമെന്നും അദ്ദേഹം കുറ്റപ്പടുത്തി.
കേരളാ പ്രദേശ് ടോഡി & അബ്കാരി മസ്ദൂര്‍ ഫെഡറേഷന്‍ (ബിഎംഎസ്) 12 ാമത് സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ബാര്‍ ഹോട്ടലുകളുടെ സമയം വര്‍ദ്ധിപ്പിക്കുക വഴി കോടിക്കണക്കിന് രൂപയുടെ അഴിമതി നടത്താനുള്ള നീക്കമാണുള്ളത്. ഈ തീരുമാനം പിന്‍വലിച്ച് പരമ്പരാഗത കള്ളുചെത്ത് വ്യവസായത്തെ സംരക്ഷിക്കാനും ദുരപരിധി 200 മീറ്ററായി നിജപ്പെടുത്തണമെന്നും അദ്ദേഹം ആവശ്യപ്പെട്ടു. ഫെഡറേഷന്‍ പ്രസിഡന്റ് പി.എസ്. ശശി അധ്യക്ഷനായി.
ബിഎംഎസ് ദേശീയസമതി അംഗം അഡ്വ. ആശാമോള്‍, സംസ്ഥാന വൈസ് പ്രസിഡന്റ് സി.ജി. ഗോപകുമാര്‍, അസംഘടിത മേഖലാ സംസ്ഥാന പ്രഭാരി എം.പി. ചന്ദ്രശേഖരന്‍, ബിഎംഎസ് ആലപ്പുഴ ജില്ലാ സെക്രട്ടറി ജി. ഗോപകുമാര്‍, ഫെഡറേഷന്‍ ഭാരവാഹികളായ സി. ഗോപകുമാര്‍, കെ.എന്‍. മോഹനന്‍, വി.എന്‍. രവീന്ദ്രന്‍, എ.സി. കൃഷ്ണന്‍, വി.വി. ബാലകൃഷ്ണന്‍, കെ. ജയന്‍ തുടങ്ങിയവര്‍ സംസാരിച്ചു. ഭാരവാഹികളായി പി.എസ്. ശശി- പ്രസിഡന്റ്, കെ. മോഹനന്‍ (കോട്ടയം), എ.സി. കൃഷ്ണന്‍ (തൃശൂര്‍), വി.പി. ബാലകൃഷ്ണന്‍ (കാസര്‍കോട്), പി. യശോധരന്‍ (ആലപ്പുഴ) വൈസ് പ്രസിഡന്റുമാര്‍, സി. ഗോപകുമാര്‍ (ആലപ്പുഴ)- ജനറല്‍ സെക്രട്ടറി, കെ. ജയന്‍ (തൊടുപുഴ), പി.ആര്‍. രാജീവ് (കോട്ടയം), പി.വി. മനീഷ് (എറണകുളം), സുധീഷ് (തൃശൂര്‍), രാജമണി (പാലക്കാട്), സി. സാംജിത്ത് (വയനാട്), അജികുമാര്‍ (പത്തനംതിട്ട)- സെക്രട്ടറിമാര്‍, വി.എന്‍. രവീന്ദ്രന്‍ (ചെറുതോണി)- ട്രഷറര്‍ എന്നിവരടങ്ങുന്ന 23 അംഗസമിതിയേയും തെരഞ്ഞെടുത്തു.
