തിരുവനന്തപുരം നെടുമങ്ങാട് ജില്ലാ ആശുപത്രിയില് സമരത്തിലുളള ഡോക്ടര്മാര് ആറ്റുകാല് പൊങ്കാല ഡ്യൂട്ടി ബഹിഷ്കരിക്കുമെന്ന തീരുമാനം മാറ്റി. കെജിഎംഒഎ തിരുവനന്തപുരം ജില്ലാ ജനറല് ബോഡിയില് നടന്ന ചര്ച്ചയിലാണ് തീരുമാനം.
ആശുപത്രിയില് നവജാത ശിശു മരിച്ച സംഭവത്തില് സൂപ്രണ്ടിന് നേരെ ആക്രമണമുണ്ടായതില് നടപടി വേണം, ഡോ. ബിന്ദു സുന്ദറിന്റെ സസ്പെന്ഷനില് തീരുമാനമെടുക്കണം എന്നീ ആവശ്യങ്ങള് ഉന്നയിച്ചാണ് കെജിഎംഒഎയുടെ പ്രതിഷേധം.
നെടുമങ്ങാട് ജില്ലാ ആശുപത്രിയിലെ ഡോക്ടര്മാരുടെ സമരത്തില് മനുഷ്യാവകാശ കമ്മീഷന് പരാതി നല്കിയിട്ടുണ്ട്. കഴിഞ്ഞ അഞ്ചുദിവസമായി ആശുപത്രിയിലെത്തുന്ന രോഗികള്ക്ക് ചികിത്സ നിഷേധിക്കുന്നുവെന്നാണ് പരാതി.
പ്രസവ ശസ്ത്രക്രിയയ്ക്കിടെ നവജാത ശിശു മരിച്ച സംഭവമാണ് നിലവിലെ വിവാദങ്ങള്ക്ക് കാരണം. സംഭവത്തില് ഡോക്ടറുടെ ഭാഗത്ത് ഗുരുതര വീഴ്ച സംഭവിച്ചുവെന്ന് വിദഗ്ധ സമിതി അന്വേഷണത്തില് കണ്ടെത്തിയിരുന്നു. ഇത് പ്രകാരം ആരോഗ്യവകുപ്പ് ഡോ. ബിന്ദു സുന്ദറിനെ സസ്പെന്ഡ് ചെയ്തിട്ടുണ്ട്.എന്നാല്, ഈ നടപടി ഏകപക്ഷീയമാണെന്നും മതിയായ തെളിവുകളില്ലാതെയാണ് ഡോക്ടറെ സസ്പെന്ഡ് ചെയ്തതെന്നുമാണ് കെജിഎംഒഎയുടെ വാദം.
