ലണ്ടന്: ഇംഗ്ലീഷ് പ്രീമിയര് ലീഗ് ഫുട്ബോളില് ടോട്ടനത്തിനെതിരെ അവരുടെ തട്ടകത്തില് തകര്പ്പന് വിജയവുമായി ആഴ്സണല് എഫ്സി. 4-1ന്റെ ജയത്തോടെ ആഴ്സണല് ലീഗ് പട്ടികയില് മുന്നിര സ്ഥാനത്തെ പോയിന്റ് ലീഡ് അഞ്ചാക്കി ഉയര്ത്തി. 27 മത്സരങ്ങള് കളിച്ച രണ്ടാം സ്ഥാനക്കാരായ മാഞ്ചസ്റ്റര് സിറ്റിക്ക് 56 പോയിന്റാണുള്ളത്. ആഴ്സണല് ഇതുവരെ 28 മത്സരങ്ങള് പൂര്ത്തിയാക്കി കഴിഞ്ഞു.
തുടര്ച്ചയായ രണ്ട് സമനിലകള്ക്ക് ശേഷമാണ് ആഴ്സണല് വിജയിച്ചിരിക്കുന്നത്. സ്ട്രൈക്കര്മാരായ ഇംഗ്ലണ്ട് താരം എബെറെച്ചെ എസെയും സ്വീഡനില് നിന്നുള്ള വിക്ടര് ഗ്യോക്കറസും നേടിയ ഇരട്ടഗോള് ആണ് ആഴ്സണലിന് ഉജ്ജ്വല വിജയം സമ്മാനിച്ചത്. മത്സരത്തിന്റെ 32-ാം മിനിറ്റില് എസെ ആഴ്സണലിനായി ആദ്യ ഗോള് നേടി. രണ്ട് മിനിറ്റിനകം ടോട്ടനത്തിന് വേണ്ടി ഫ്രഞ്ച് സ്ട്രൈക്കര് റന്ഡാല് കോളോ മുവാനി ഗോള് മടക്കി. ഈ ഓരോ ഗോള് സമനിലയില് കളിയുടെ ആദ്യ പകുതി അവസാനിച്ചു.
രണ്ടാം പകുതിയുടെ തുടക്കത്തില് ഗ്യോക്കറസ് ആഴ്സണലിനായി ലീഡ് തിരിച്ചുപിടിച്ചു. 61-ാം മിനിറ്റില് എസെ ഇരട്ടഗോള് തികച്ചുകൊണ്ട് ലീഡ് വര്ദ്ധിപ്പിച്ചു. മത്സരം സ്റ്റോപ്പേജ് സമയത്തിലേക്ക് കടന്നപ്പോള് ഗ്യോക്കറസ് ബൂട്ടില് നിന്നും വീണ്ടും പന്ത് ടോട്ടനം വലയെ ഭേദിച്ചു.
