അയിരൂര്‍: ഹൈന്ദവര്‍ ഒരുമിച്ചാല്‍ വര്‍ഗീയമായി ചിത്രീകരിക്കുന്ന സാഹചര്യമാണ് ഇന്നുള്ളതെന്ന് ശിവഗിരി മഠം പ്രസിഡന്റ് സ്വാമി സച്ചിദാനന്ദ.
സംഘടിച്ച് ശക്തരാകാനുള്ള ശ്രീനാരായണ ഗുരുവേന്റെ വാക്കുകള്‍ ഇന്ന് ഏറെ പ്രസക്തമാവുകയാണെന്നും സ്വാമി അഭിപ്രായപ്പെട്ടു. ഹിന്ദുമത മഹാമണ്ഡലം അയിരൂര്‍ പമ്പാ മണല്‍പ്പുറത്ത് സംഘടിപ്പിച്ച 114-ാമത് ഹിന്ദുമത പരിഷത്തിന്റെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു സ്വാമി.
ഇതര മതങ്ങള്‍ക്കെല്ലാം സംഘടിക്കാം. എന്നാല്‍ ഹൈന്ദവര്‍ ഒന്നിച്ചാല്‍ മാത്രം വര്‍ഗീയതയാകും. 42 വര്‍ഷമായി ഒരു തീര്‍ത്ഥാടകനായാണ് ഞാന്‍ ചെറുകോല്‍പ്പുഴ ഹിന്ദുമത പരിഷത്തിലെത്തിച്ചേരുന്നത്. മഹാത്മാക്കളുടെ പാദ സ്പര്‍ശം കൊണ്ടും പ്രഭാഷണങ്ങള്‍ കൊണ്ടും പുണ്യഭൂമിയായ ചെറുകോല്‍പ്പുഴയില്‍ അറിവിന്റെ തീര്‍ത്ഥാടനമാണ് നടക്കുന്നത്.
ശ്രീനാരായണ ഗുരുവിനെ പോലും സനാതന ധര്‍മ്മത്തിന് വിരുദ്ധനായി പ്രചരിപ്പിക്കാന്‍ ശ്രമം നടക്കുന്ന കാലഘട്ടമാണ് ഇത്. ഗുരുദേവന്റെ 73 വര്‍ഷത്തെ ദീപ്തമായ ജീവിതത്തിലും കൃതികളിലും സനാതന ധര്‍മത്തിന് വിരുദ്ധമായി ഒന്നുമില്ല. ഭാരതത്തിന്റെ അടിസ്ഥാന ഗ്രന്ഥം വേദങ്ങളാണ്. വേദാന്തം അറിവിന്റെ അവസാനമാണ്. ഉപനിഷത്തിന് തുല്യമായ ജ്ഞന സരണി ലോകത്ത് മറ്റെങ്ങും കാണാനില്ല.
ഏതെങ്കിലും ലോകത്ത് ഒളിഞ്ഞിരുന്ന് ശിക്ഷ നിര്‍വ്വഹിക്കുന്ന ദൈവത്തെയല്ല മനുഷ്യരിലും സര്‍വ്വ ചരാചരങ്ങളിലും കുടികൊള്ളുന്ന ഈശ്വരനെയാണ് സനാതന ധര്‍മം മുന്നോട്ട് വയ്‌ക്കുന്നതെന്നും സച്ചിദാനന്ദ സ്വാമി അഭിപ്രായപ്പെട്ടു.
