അയിരൂര്‍: ഹൈന്ദവ സംസ്‌കാരത്തെ ഇല്ലാതാക്കാനുള്ള ആസുത്രിത ശ്രമങ്ങള്‍ നടക്കുന്ന കാലഘട്ടത്തില്‍ ചെറുകോല്‍പ്പുഴ ഹിന്ദുമത പരിഷത്ത് പോലെയുള്ള സംഗമങ്ങള്‍ക്ക് പ്രസക്തി ഏറുകയാണെന്ന് ഹിന്ദുമത മഹാമണ്ഡലം വൈസ് പ്രസിഡന്റ് അഡ്വ. കെ ഹരിദാസ്. അയിരൂര്‍ പമ്പാ മണല്‍പ്പുറത്ത് 114-ാമത് ഹിന്ദുമത പരിഷത്തിന്റെ സമാപന സമ്മേളനത്തില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
ഭക്തരുടെ വിയര്‍പ്പിന്റെ അംശമായി സമര്‍പ്പിക്കുന്ന പണം എന്തിന് ഉപയോഗിക്കുന്നു എന്ന് അറിയാന്‍ അവകാശമില്ലാത്ത സമൂഹമായി ഹിന്ദു മാറിയെന്ന് മുഖ്യ പ്രഭാഷണം നടത്തിയ കുമ്മനം രാജശേഖരന്‍ അഭിപ്രായപ്പെട്ടു.
സനാതന ധര്‍മത്തെ രാഷ്‌ട്രീയമായി ഉപയോഗപ്പെടുത്താന്‍ ശ്രമിക്കുമ്പോള്‍ അതിലെ ബഹുസ്വരതയെ ഇല്ലാതാക്കാന്‍ ശ്രമം ഉണ്ടാകുമെന്ന് മുന്‍ പ്രതിപക്ഷ നേതാവ് രമേശ് ചെന്നിത്തല പറഞ്ഞു.
ഏഷ്യാനെറ്റ് എക്‌സിക്യൂട്ടീവ് എഡിറ്റര്‍ പി.ജി. സുരേഷ് കുമാര്‍, വിദ്യാധിരാജാ ഗുരുകുലം ഡയറക്ടര്‍ ഹരികൃഷ്ണന്‍ ഹരിദാസ് എന്നിവരെ ഹിന്ദുമത മഹാമണ്ഡലം പ്രസിഡന്റ് പി.എസ്. നായര്‍ ആദരിച്ചു. കിടക്കുന്നുര്‍ വിജയാനന്ദാശ്രമം മഠാധിപതി സ്വാമിനി കൃഷ്ണാനന്ദ പൂര്‍ണ്ണിമ, ശിവഗിരി മഠത്തിലെ സ്വാമി ദേവാത്മാനന്ദ സരസ്വതി, ഇടപ്പാവൂര്‍ വിദ്യാധിരാജ തീര്‍ത്ഥ പാദാശ്രമത്തിലെ സ്വാമി സര്‍വ്വാത്മാനന്ദ തീര്‍ത്ഥപാദര്‍, എന്നിവര്‍ പ്രഭാഷണം നടത്തി.
തിരുവല്ല അമൃതാനന്ദമയീ മഠത്തിലെ സ്വാമിനി ഭവ്യാമൃതപ്രാണ സമാപന സന്ദേശം നല്‍കി. ഹിന്ദുമത മഹാമണ്ഡലം സെക്രട്ടറി അഡ്വ. ഡി. രാജഗോപാല്‍ സ്വാഗതവും, ജനറല്‍ സെക്രട്ടറി എ.ആര്‍. വിക്രമന്‍ പിള്ള നന്ദിയും പറഞ്ഞു. അബിന്‍ വര്‍ക്കി, റിങ്കു ചെറിയാന്‍, ജില്ലാ പഞ്ചായത്ത് അംഗങ്ങളായ സ്റ്റെല്ലാ തോമസ്, ജൂലി സാബു ഓലിക്കല്‍, കോയിപ്രം ബ്ലോക്ക് പഞ്ചായത്ത് പ്രസിഡന്റ് ടി.കെ. രാമചന്ദ്രന്‍ നായര്‍ എന്നിവരും സമാപന സഭയില്‍ പങ്കെടുത്തു.
