മതപരിവര്‍ത്തനങ്ങളും മത തീവ്രവാദികളും വെല്ലുവിളികള്‍ക്ക് പരിഹാരം ഗുരുദേവ ദര്‍ശനം: സ്വാമി സച്ചിദാനന്ദ

ശിവഗിരി: മതപരിവര്‍ത്തനങ്ങളും മത തീവ്രവാദികളും ഉയര്‍ത്തുന്ന വെല്ലുവിളികള്‍ക്ക് പരിഹാരം ഗുരുദേവ ദര്‍ശനമാണെന്ന് ശ്രീനാരായണ ധര്‍മ സംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ പറഞ്ഞു. ശിവഗിരി തീര്‍ത്ഥാടനത്തിലെ സമാപന സമ്മേളനത്തില്‍ സംസാരിക്കുകയായിരുന്നു സ്വാമികള്‍.

ശ്രീനാരായണ ഗുരുവിന്റെ ദര്‍ശനങ്ങള്‍ ജാതി കാല ദേശ ഭേദമില്ലാതെ ലോകം മുഴുവന്‍ എത്തിക്കേണ്ട കടമ ഗുരുവിന്റെ ശിഷ്യപരമ്പരയ്‌ക്ക് ഉണ്ട്. ഗുരുവിന്റെ ദര്‍ശനങ്ങള്‍ മലയാളികള്‍ മാത്രം അറിഞ്ഞാല്‍ പോര. ഗുരുവിനെ ഒരു ജാതിയുടെ വക്താവായി ഒരു മൂലയ്‌ക്കിരുത്താനുള്ള ശ്രമം ശരിയല്ല. മുക്കുവരും നമ്പൂതിരിയും ക്രിസ്ത്യാനിയും മുസ്ലീമും തുടങ്ങി വിവിധ ജാതി മതത്തില്‍പ്പെട്ടവരായിരുന്നു ഗുരുവിന്റെ ശിഷ്യപരമ്പര. അതില്‍ ദൈവ വിശ്വാസമുള്ളവരും ഇല്ലാത്തവരും കവികളും വിപ്ലവകാരികളും നിരീശ്വരവാദികളും തത്വചിന്തകരും ഉണ്ടായിരുന്നു.

ശബരിമലയില്‍ സ്ത്രീകളെ പ്രവേശിപ്പിക്കുന്നതില്‍ യാതൊരു തെറ്റുമില്ല. ഗുരുവായൂര്‍ ക്ഷേത്രക്കുളത്തില്‍ കാല്‍ കഴുകി എന്ന പേരില്‍ ഒരു സ്ത്രീയെ അയിത്തം കല്പിച്ചു മാറ്റുന്നത് ശരിയല്ല. യേശുദാസിനെ ഹിന്ദുവല്ലെന്ന് പറഞ്ഞ് ഗുരുവായൂര്‍ ക്ഷേത്രത്തില്‍ വിലക്കുന്ന നടപടി പരിശോധിക്കേണ്ടതാണെന്നും സ്വാമി സച്ചിദാനന്ദ പറഞ്ഞു.

പീതാംബര ദീക്ഷയുടുത്ത് വ്രതധാരികളായി പതിനായിരക്കണക്കിന് ഭക്തര്‍ എത്തിയ 93-ാമത് ശിവഗിരി മഹാതീര്‍ത്ഥാടനത്തിന് സമാപനമായി. കഴിഞ്ഞ മൂന്ന് ദിവസമായി ശിവഗിരി കുന്നുകള്‍ ഗുരുദേവനാമങ്ങളാല്‍ ഭക്തിസാന്ദ്രമായിരുന്നു. വിവിധ സ്ഥലങ്ങളില്‍ നിന്നെത്തിയ തീര്‍ത്ഥാടന പദയാത്രകള്‍ ഗുരുദേവ സമാധിയിലെത്തിയാണ് സമാപിച്ചത്.

മഹാസമാധിയിലെ ഗുരുദേവ പ്രതിമാ പ്രതിഷ്ഠയുടെ 58 ാം വാര്‍ഷിക ദിനാചരണത്തിന്റെ ഭാഗമായി രാവിലെ 7.30 ന് ശാരദാ മഠത്തില്‍ നിന്ന് 108 പുഷ്പ കലശങ്ങളുമായി നാമ ജപത്തോടെയും പഞ്ചവാദ്യ അകമ്പടിയോടെയും മഹാസമാധി മന്ദിരത്തിലെത്തി അഭിഷേകം നടത്തി.

തീര്‍ത്ഥാടന ആഡിറ്റോറിയത്തില്‍ നടന്ന ശ്രീനാരായണ പ്രസ്ഥാന സംഗമം പശ്ചിമ ബംഗാള്‍ ഗവര്‍ണര്‍ ഡോ. സി.വി. ആനന്ദബോസ് ഉദ്ഘാടനം ചെയ്തു.

സ്വാമി വിവേകാനന്ദന്‍ ഭ്രാന്താലയം എന്ന് വിശേഷിപ്പിച്ച കേരളത്തെ സാമൂഹ്യ വിപ്ലവത്തിലൂടെ ശുദ്ധീകരിച്ചെടുത്ത ശ്രീനാരായണ ഗുരുദേവന്‍ യഥാര്‍ത്ഥ വിശ്വഗുരുവാണെന്ന് ആനന്ദബോസ് പറഞ്ഞു. ശ്രീനാരായണഗുരു ലോക ജനതയെ ഒന്നായി കണ്ടു. എല്ലാവരും ഈശ്വരന്റെ സൃഷ്ടികളാണ്, കാടുപിടിച്ച മര്‍ത്യ മനസ് വെട്ടിത്തെളിച്ച് സ്‌നേഹവും പ്രേമവും കരുണയും ഉള്ളതാക്കി മാറ്റാന്‍ ശ്രീനാരായണ ഗുരുവിന് സാധിച്ചെന്നും അദ്ദേഹം പറഞ്ഞു.

കര്‍ണാടക സ്പീക്കര്‍ യു. ടി. ഖാദര്‍ അധ്യക്ഷനായി. ശശി തരൂര്‍ എം പി മുഖ്യപ്രഭാഷണം നടത്തി. സ്വാമി ഋതംഭരാനന്ദ, മുന്‍ ഡിജിപി ഡോ. ടി.പി. സെന്‍കുമാര്‍, പി. ചന്ദ്രമോഹന്‍, അമ്പലത്തറ രാജന്‍ തുടങ്ങിയവര്‍ സംസാരിച്ചു. വൈകിട്ട് നടന്ന സമാപന സമ്മേളനം മന്ത്രി സജി ചെറിയാന്‍ ഉദ്ഘാടനം ചെയ്തു.