ഇസ്ലാമബാദ്: എന്തൊക്കെയായിരുന്നു ട്രംപിന്റെ പാക് പ്രേമപ്രകടനങ്ങള്‍. പല തവണയാണ് പാക് ഫീല്‍ഡ് മാര്‍ഷല്‍ അസിം മുനീറിനെ വൈറ്റ് ഹൗസിലേക്ക് വിരുന്ന് വിളിച്ചത്. പക്ഷെ ഒടുവില്‍ ഇന്ത്യയ്‌ക്ക് പാകിസ്ഥാനേക്കാള്‍ കുറഞ്ഞ വ്യാപാരത്തീരുവ ഏര്‍പ്പെടുത്തിയപ്പോള്‍ പാകിസഥാന്‍ ശരിയ്‌ക്കും ഞെട്ടി. ഇന്ത്യയ്‌ക്ക് 18 ശതമാനം വ്യാപരത്തീരുവ ഏര്‍പ്പെടുത്തിയപ്പോള്‍ പാകിസ്ഥാന് അത് 20 ശതമാനമാണ്.
ഇപ്പോഴിതാ അതിനേക്കാള്‍ ഞെട്ടലുളവാക്കുന്ന വാര്‍ത്തയാണ് പുറത്തുവന്നിരിക്കുന്നത്. പാകിസ്ഥാന് സൈന്യത്തിനെ ബോംബ് സ്ഫോടനങ്ങളിലൂടെയും ചാവേര്‍ ആക്രമണത്തിലൂടെയും കടന്നാക്രമിക്കുന്ന ബെലൂചികള്‍ ഉപയോഗിക്കുന്നത് അമേരിക്കന്‍ ആയുധങ്ങളാണെന്ന വിവരമാണ് പുറത്തുവന്നിരിക്കുന്നത്. സ്വന്തം രാജ്യത്ത് ആഭ്യന്തരകലാപമുണ്ടാക്കുന്നവര്‍ക്ക് അമേരിക്ക ആയുധങ്ങള്‍ നല്‍കുന്നു എന്ന വാര്‍ത്ത പാകിസ്ഥാന് സര്‍ക്കാരിന് വലിയ ആഘാതമാണ് ഉണ്ടാക്കിയിരിക്കുന്നത്.
ഏകേശം 700 കോടി ഡോളറിന്റെ അമേരിക്കന്‍ആയുധങ്ങളാണ് ബെലൂചികള്‍ക്ക് നല്‍കിയിരിക്കുന്നത്. രാത്രി കാഴ്ച നല്‍കുന്ന ഉപകരണങ്ങള്‍, എം16, എം4 റൈഫിളുകള്‍, ഡ്രോണുകള്‍ എന്നിവ ഉണ്ട്. പാകിസ്ഥാന്റെ ട്രെയിന്‍ ഹൈജാക്ക് ചെയ്ത് അതിലെ യാത്രക്കാരെ ബന്ദികളാക്കാനും പാകിസ്ഥാന് പട്ടാളപോസ്റ്റുകളില്‍ കടന്നാക്രമണം നടത്താനും ബെലൂചികള്‍ക്ക് വീര്യം പകരുന്നത് ഈ അമേരിക്കയിലെ ആധുനിക ആയുധങ്ങളാണ്. അഫ്ഗാനിസ്ഥാന്‍ വിട്ടുപോയപ്പോള്‍ അമേരിക്കന്‍ സൈന്യത്തിന്റെ പക്കല്‍ ബാക്കിയുണ്ടായിരുന്ന ആയുധങ്ങളാണ് ബെലൂചികള്‍ വാങ്ങിയത് എന്ന് പറയപ്പെടുന്നുണ്ടെങ്കിലും അല്ലാതെയും അവര്‍ക്ക് ആയുധങ്ങള്‍ ലഭിക്കുന്നതായാണ് വിവരം.
ഈയിടെ താല്‍ക്കാലിക കുടിയേറ്റ വിസകള്‍ അനുവദിക്കുന്ന നിയമത്തില്‍ അമേരിക്ക മാറ്റം വരുത്തിയിരുന്നു. ഇതില്‍ നിന്നും പാകിസ്ഥാനെ ഒഴിവാക്കിയിരിക്കുകയാണ്. അതേ സമയം ഇന്ത്യയെ പട്ടികയില്‍ നിലനിര്‍ത്തിയിട്ടുമുണ്ട്.
