ആലപ്പുഴ: അരൂര്-തുറവൂര് ഉയരപ്പാത തുടങ്ങുന്ന തുറവൂര് ജങ്ഷനില് നിലവിലെ ഡിസൈന് മാറ്റത്തിനു പദ്ധതി തയാറാകുന്നു. തുറവൂര് ജങ്ഷനില് നിന്നു തെക്കോട്ട് 350 മീറ്റര് മണ്ണിട്ടുയര്ത്തി അപ്രോച്ച് റോഡ് നിര്മിക്കാനായിരുന്നു മുന്പ് തീരുമാനിച്ചിരുന്നത്. ഇതിനു പകരമായി ജങ്ഷനില് നിന്നു 200 മീറ്റര് തെക്കോട്ട് തൂണുകളിലും പിന്നീട് 280 മീറ്റര് മണ്ണിട്ടുയര്ത്തിയുള്ള അപ്രോച്ച് റോഡും നിര്മിച്ചു തുറവൂര് പറവൂര് റീച്ചിലെ 6 വരി പാതയില് ബന്ധിപ്പിക്കുന്ന വിധമാണു പുതിയ ഡിസൈന് തീരുമാനം.ഇതോടെ അരൂര് തുറവൂര് ഉയരപ്പാതയുടെ നീളം 12.75 കിലോമീറ്ററില് നിന്നു 13 കിലോമീറ്ററിലധികമായി മാറും.
തുറവൂര് ജങ്ഷനില് നിന്നു തെക്കോട്ട് മണ്ണിട്ടുയര്ത്തി അപ്രോച്ച് റോഡ് നിര്മിക്കുന്നതോടെ തുറവൂര് ജങ്ഷനിലെ വികസന പ്രവര്ത്തനങ്ങള്ക്ക് തടസ്സമാകുമെന്ന് നാട്ടുകാരും വിവിധ രാഷ്ട്രീയ കക്ഷികളും ചൂണ്ടിക്കാട്ടിയതോടെയാണ് ഡിസൈന് മാറ്റുന്നതിനുള്ള തീരുമാനത്തിലെത്തിയത്. എട്ട് മാസം മുന്പ് ഇതിനായുള്ള നടപടി തുടങ്ങിയിരുന്നു. അന്തിമ തീരുമാനമാകാത്തതിനെത്തുടര്ന്ന് ഉയരപ്പാതയും താഴെയുള്ള റോഡുമായി ബന്ധിപ്പിക്കുന്ന അപ്രോച്ച് റോഡിന്റെ തെക്കോട്ടുള്ള ജോലികള് നിലച്ചിരുന്നു.
374 ഒറ്റത്തൂണുകളിലാണ് അരൂര്, എഴുപുന്ന, കോടംതുരുത്ത്, കുത്തിയതോട്, തുറവൂര് എന്നീ ഗ്രാമ പഞ്ചായത്തുകളിലൂടെ ആറുവരിപ്പാത കടന്നുപോകുന്നത്. രാജ്യത്തെ ഏറ്റവും വലിയ ഉയരപ്പാതയാണിത്. പാത നിര്മ്മാണത്തിനിടെ അശാസ്ത്രീയമായ ഗതാഗതക്രമീകരണങ്ങള് കാരണം വര്ഷത്തിലേറെയായി യാത്രക്കാരും പ്രദേശവാസികളും ഏറെ വലയുകയാണ്. മണിക്കൂറുകള് നീണ്ട ഗതാഗതകുരുക്കാണ് അനുഭവപ്പെടുന്നത്. നിരവധി അപകടങ്ങളും സംഭവിച്ചു കഴിഞ്ഞു. നൂറു കണക്കിന് ആളുകള്ക്ക് പരിക്കേറ്റു. നിരവധി ജീവനുകള് നഷ്ടമായി. നിര്മ്മാണ കമ്പനിയുടെ അനാസ്ഥയിലും നിരവധി ജീവനുകളും പൊലിഞ്ഞു. കടുത്ത പ്രതിഷേധത്തിനിടെയാണ് നിര്മ്മാണം പുരോഗമിക്കുന്നത്.
