മുതിർന്ന പൗരന്മാർക്കായി പോസ്റ്റ് ഓഫീസ് അവതരിപ്പിക്കുന്ന മികച്ച പദ്ധതിയാണ് സീനിയർ സിറ്റിസൺ സേവിംഗ്സ് സ്കീം (SCSS). 2026 ജനുവരി-മാർച്ച് പാദത്തിലും ഈ പദ്ധതിക്ക് 8.2 ശതമാനം പലിശയാണ് സർക്കാർ വാഗ്ദാനം ചെയ്യുന്നത്.
ബാങ്ക് സ്ഥിരനിക്ഷേപങ്ങളേക്കാൾ ഉയർന്ന പലിശയും സർക്കാർ ഗ്യാരണ്ടിയും ഈ പദ്ധതിയെ ആകർഷകമാക്കുന്നു. ഈ സ്കീമിലൂടെ പ്രതിമാസം 17,000 രൂപയിലധികം വരുമാനം എങ്ങനെ നേടാം എന്ന് പരിശോധിക്കാം.60 വയസ്സോ അതിൽ കൂടുതലോ പ്രായമുള്ള ഏതൊരു വ്യക്തിക്കും ഈ അക്കൗണ്ട് തുടങ്ങാം. വിആർഎസ് (VRS) എടുത്തവർക്ക് 55 വയസ്സ് മുതൽ നിബന്ധനകളോടെ അക്കൗണ്ട് തുടങ്ങാൻ അനുവാദമുണ്ട്. കുറഞ്ഞത് 1,000 രൂപ മുതൽ നിക്ഷേപം ആരംഭിക്കാം. പരമാവധി 30 ലക്ഷം രൂപ വരെയാണ് ഒരാൾക്ക് നിക്ഷേപിക്കാനാകുക.
പങ്കാളിയുമായി ചേർന്ന് ജോയിന്റ് അക്കൗണ്ടായും ഇത് തുടങ്ങാവുന്നതാണ്. അഞ്ച് വർഷമാണ് പദ്ധതിയുടെ കാലാവധി. ആവശ്യമെങ്കിൽ കാലാവധിക്ക് ശേഷം മൂന്ന് വർഷത്തേക്ക് കൂടി നീട്ടാനും സാധിക്കും.
സീനിയർ സിറ്റിസൺ സേവിംഗ്സ് സ്കീമിൽ പലിശ ഓരോ മൂന്ന് മാസത്തിലുമാണ് (Quarterly) നൽകുന്നത്. എങ്കിലും ഇത് മാസ വരുമാനമായി കണക്കാക്കിയാൽ മികച്ചൊരു തുക ലഭിക്കും. ഉദാഹരണത്തിന്, ഒരു വ്യക്തി 25 ലക്ഷം രൂപ ഈ പദ്ധതിയിൽ നിക്ഷേപിക്കുകയാണെങ്കിൽ:
* ഒറ്റത്തവണ നിക്ഷേപം: 25,00,000 രൂപ
* പലിശ നിരക്ക്: 8.2%
* അഞ്ച് വർഷത്തെ ആകെ പലിശ: 10,25,000 രൂപ
* ഒരു വർഷത്തെ പലിശ വരുമാനം: 2,05,000 രൂപ
* ഓരോ മൂന്ന് മാസത്തിലും ലഭിക്കുന്ന തുക: 51,250 രൂപ
* പ്രതിമാസ വരുമാനമായി കണക്കാക്കിയാൽ: 17,083 രൂപ
കാലാവധിക്ക് ശേഷം നിക്ഷേപിച്ച 25 ലക്ഷം രൂപ പൂർണ്ണമായും തിരികെ ലഭിക്കും. 30 ലക്ഷം രൂപയാണ് നിക്ഷേപിക്കുന്നതെങ്കിൽ പ്രതിമാസ വരുമാനം 20,500 രൂപയായി വർദ്ധിക്കും.
ഈ പദ്ധതിയിൽ നടത്തുന്ന നിക്ഷേപങ്ങൾക്ക് ആദായനികുതി നിയമത്തിലെ സെക്ഷൻ 80 സി പ്രകാരം 1.5 ലക്ഷം രൂപ വരെ നികുതി ഇളവ് ലഭിക്കും. സർക്കാർ നേരിട്ട് നടത്തുന്ന പദ്ധതിയായതിനാൽ ഇതിൽ യാതൊരുവിധ സാമ്പത്തിക റിസ്കും ഇല്ല. കാലാവധി പൂർത്തിയാകുന്നതിന് മുമ്പ് പണം പിൻവലിക്കാൻ സാധിക്കുമെങ്കിലും നിശ്ചിത തുക പിഴയായി നൽകേണ്ടി വരും. അടുത്തുള്ള ഏതൊരു പോസ്റ്റ് ഓഫീസ് ശാഖ വഴിയും ഈ അക്കൗണ്ട് തുടങ്ങാൻ സാധിക്കും.
