ന്യൂദല്ഹി: ഏറെ വൈകിയ ഇന്ത്യന് സൂപ്പര് ലീഗ്(ഐഎസ്എല്) 2025-26 സീസണിലെ ഷെഡ്യൂള് അഖിലേന്ത്യാ ഫുട്ബോള് ഫെഡറേഷന് ഔദ്യോഗികമായി പ്രഖ്യാപിച്ചു. ലീഗിന്റെ 12-ാം പതിപ്പാണ് ഇത്. 14ന് കേരള ബ്ലാസ്റ്റേഴ്സ്-മോഹന് ബഗാന് സൂപ്പര് ജയന്റ്സ് പോരാട്ടത്തോടെ തുടങ്ങുന്ന സീസണ് മെയ് 17ന് സമാപിക്കും. ആകെ 91 മത്സരങ്ങളാണുള്ളത്.
കൊല്ക്കത്തയില് സാള്ട്ട്ലേക്ക് സ്റ്റേഡിയത്തിലാണ് ഉദ്ഘാടന മത്സരം. ആദ്യ ദിവസം ഉല്പ്പെടെ പല ദിവസങ്ങളിലും രണ്ട് വീതം മത്സരങ്ങളുണ്ട്. ശനിയാഴ്ച വൈകീട്ട് അഞ്ചിനാണ് കേരളം-മോഹന് ബഗാന് പോരാട്ടം. രാത്രി 7.30ന് എഫ്സി ഗോവയും ഇന്റര് കാശിയും ഏറ്റുമുട്ടും. ഫറ്റോര്ഡയിലാണ് മത്സരം.
ആകെ 14 ടീമുകളാണ് ഇത്തവണ ഉള്ളത്. മുന് സീസണിലെ 13 ടീമുകളും കഴിഞ്ഞ തവണ ഐ ലീഗ് ജേതാക്കളായി യോഗ്യത നേടിയ ഇന്റര് കാശിയും. ഹൈദരാബാദ് എഫ്സി ക്ലബ്ബിന്റെ ആസ്ഥാനം ദല്ഹി ക്ലബ്ബിലേക്ക് മാറ്റയതിനാല് ടീം പേരും മാറിയിട്ടുണ്ട്. എസ് സി ദല്ഹി എന്ന പേരിലായിരിക്കും ഈ ടീം പുതിയ സീസണില് കളത്തിലെത്തുക.
എല്ലാ ടീമുകളും ഓരോ തവണ വീതം തമ്മില് പോരടിക്കുന്ന റൗണ്ട് റോബിന് സംവിധാനത്തിലുള്ള മത്സരങ്ങളാണ് ഇത്തവണ വിഭാവനം ചെയ്തിരിക്കുന്നത്. രണ്ടാംപാദ മത്സരങ്ങള് ഉണ്ടാവില്ല. മുന് സീസണുകളില് നിന്ന് വ്യത്യസ്തമായി പ്ലേ ഓഫ് മത്സരങ്ങളും ഫൈനലും ഒഴിവാക്കി. പകരം ലീഗ് മത്സരങ്ങള് മാത്രമാണുണ്ടാകുക. ആകെ 91 മത്സരങ്ങള്. പോയിന്റ് പട്ടികയില് മുന്നിലെത്തുന്ന ടീം ജേതാക്കളാകും.
