ന്യൂദല്ഹി: വരും സീസണില് ഇന്ത്യന് സൂപ്പര് ലീഗ് (ഐഎസ്എല്)അതിന്റെ പഴയ ഫോര്മാറ്റിലേക്ക് മടങ്ങുമെന്ന് അഖിലേന്ത്യാ ഫുട്ബോള് ഫെഡറേഷന് (എഐഎഫ്എഫ്) ബുധനാഴ്ച പ്രഖ്യാപിച്ചു. ഹോം, എവേ മത്സരങ്ങളുടെ ലീഗ് റൗണ്ടും നോക്കൗട്ട് ഘട്ടങ്ങളും ഉള്പ്പെടുന്ന തരത്തിലായിരിക്കും അടുത്ത സപ്തംബറില് ആരംഭിക്കുന്ന 2026-27 ഐഎസ്എല് സീസണ്.
എഐഎഫ്എഫ് ഭാരവാഹികളും ഐഎസ്എല് ക്ലബ്ബുകളായ എഫ്.സി ഗോവ, നോര്ത്ത് ഈസ്റ്റ് യുണൈറ്റഡ് എഫ്സി, സ്പോര്ട്ടിംഗ് ക്ലബ് ദല്ഹി എന്നിവയുടെ പ്രതിനിധികളും ചേര്ന്ന് നടത്തിയ വാര്ത്താസമ്മേളനത്തിലായിരുന്നു പുതിയ സീസണ് പ്രഖ്യാപനം. ദീര്ഘമായ അനിശ്ചിതത്വത്തിനൊടുവില് നടന്ന കഴിഞ്ഞ കഴിഞ്ഞ സീസണ് ഐഎസ്എല് ഏറെ വൈകിയാണ് നടന്നത്. നോക്കൗട്ട് റൗണ്ടുകല് പൂര്ണമായും ഒഴിവാക്കി. ലീഗ് അടിസ്ഥാനത്തിലാണ് മത്സരം സംഘടിപ്പിച്ചത്. മാത്രമല്ല വിവിധ വേദികളിലായി നടത്തിയെങ്കിലും ഹോം, എവേ മാനദണ്ഡം കൃത്യമായി നടപ്പാക്കിയുമില്ല.
പ്രക്ഷേപണ പങ്കാളിയെ കണ്ടെത്തുന്നതിനും സ്പോണ്സര്ഷിപ്പുകളില് പ്രവര്ത്തിക്കുന്നതിനുമായി ക്ലബ്ബുകള് ഒരു റിക്വസ്റ്റ് ഫോര് പ്രൊപ്പോസല് പുറപ്പെടുവിക്കും, കൂടാതെ ഫിഫ, എഎഫ്സി മത്സര വിന്ഡോയെ ചുറ്റിപ്പറ്റിയായിരിക്കും കലണ്ടര് ആസൂത്രണം ചെയ്യുകയെന്ന് അധികൃതര് അറിയിച്ചു. സപ്തംബര് നാലിന് ഐഎസ്എല്ലിന്റെ പുതിയ സീസണ് ആരംഭിക്കും.
