കൊച്ചി: ഐഎസ്എല്ലില്‍ തകര്‍പ്പന്‍ ഫോം തുടരുന്ന കേരള ബ്ലാസ്റ്റേഴ്സ് എഫ്.സി കൊച്ചിയില്‍ മുഹമ്മദന്‍ എസ്.സിയെ ഒന്നിനെതിരെ മൂന്ന് ഗോളുകള്‍ക്ക് പരാജയപ്പെടുത്തി. ഒരു ഗോളിന് പിന്നിലായ ശേഷം ശക്തമായി തിരിച്ചടിച്ചാണ് ബ്ലാസ്റ്റേഴ്സ് തുടര്‍ച്ചയായ മൂന്നാം വിജയവും തോല്‍വി അറിയാതെയുള്ള അഞ്ചാം മത്സരവും പൂര്‍ത്തിയാക്കിയത്. ഫ്രാഞ്ചു, വിക്ടര്‍ ബെര്‍ട്ടോമിയു, ശ്രീക്കുട്ടന്‍ എം.എസ് എന്നിവരാണ് ബ്ലാസ്റ്റേഴ്സിനായി ഗോളുകള്‍ നേടിയത്.
മത്സരത്തിന്റെ ആദ്യ പകുതിയില്‍ പന്തടക്കത്തില്‍ ബ്ലാസ്റ്റേഴ്സ് മുന്നിട്ടുനിന്നെങ്കിലും 42-ാം മിനിറ്റില്‍ മഹിതോഷ് റോയിയുടെ ലോങ്ങ് റേഞ്ച് ഗോളിലൂടെ മുഹമ്മദന്‍ എസ്.സിയാണ് ആദ്യം മുന്നിലെത്തിയത്. എന്നാല്‍ രണ്ട് മിനിറ്റിനുള്ളില്‍ തന്നെ ബ്ലാസ്റ്റേഴ്സ് മറുപടി നല്‍കി. കെവിന്‍ യോക്കിന്റെ കൃത്യമായ പാസില്‍ നിന്നും ഫ്രാഞ്ചു നേടിയ ഗോളിലൂടെ ആദ്യ പകുതിയില്‍ തന്നെ ബ്ലാസ്റ്റേഴ്സ് സമനില പിടിച്ചു.
രണ്ടാം പകുതിയില്‍ കൂടുതല്‍ ഊര്‍ജ്ജസ്വലമായി കളിച്ച ബ്ലാസ്റ്റേഴ്സ് 59-ാം മിനിറ്റില്‍ ലീഡെടുത്തു. കെവിന്‍ യോക്ക് നല്‍കിയ മനോഹരമായ ക്രോസില്‍ നിന്നും വിക്ടര്‍ ബെര്‍ട്ടോമിയു ഉജ്ജ്വലമായ ഒരു ഹെഡറിലൂടെ ടീമിന്റെ രണ്ടാം ഗോള്‍ നേടി. 74-ാം മിനിറ്റില്‍ മലയാളിയായ മുന്നേറ്റ താരം ശ്രീക്കുട്ടന്‍ എം.എസ് ബ്ലാസ്റ്റേഴ്സിന്റെ വിജയം ഉറപ്പിച്ചു. ഫ്രാഞ്ചു നല്‍കിയ പാസ് പോസ്റ്റിന്റെ മൂലയിലേക്ക് എത്തിച്ചാണ് ശ്രീക്കുട്ടന്‍ ടീമിനായി മൂന്നാം ഗോള്‍ കണ്ടെത്തിയത്. മത്സരത്തിന്റെ അവസാന ഘട്ടത്തില്‍ അമര്‍ജിത് സിംഗ് ചുവപ്പ് കാര്‍ഡ് കണ്ട് പുറത്തായത് മുഹമ്മദന്‍സിന് തിരിച്ചടിയായി.
