കൊച്ചി:അതീവ അപകടകരമായ അവസ്ഥയിലുളള വൈറ്റില സില്വര് സാന്ഡ് ഐലന്ഡിലെ ആര്മി ടവറില്നിന്നു മാറി താമസിക്കാന് ഏക താമസക്കാരനായ റിട്ട. കേണല് സിബി ജോര്ജിന് ഹൈക്കോടതിയുടെ അനുമതി.
സിബി ജോര്ജിന് നല്കാനുള്ള ബാക്കി മൂന്ന് മാസത്തെ വാടകയും (മാസം 35,000 രൂപ വീതം), വീട് മാറുന്നതിനുള്ള 30,000 രൂപയും രണ്ടാഴ്ചയ്ക്കകം നല്കണം. കോടതി നിര്ദേശം പാലിച്ചില്ലെങ്കില് ജില്ലാ കളക്ടര് നേരിട്ട് ഹാജരാകണം. ജസ്റ്റിസ് കെ. നടരാജന്, ജസ്റ്റിസ് ജോണ്സണ് ജോണ് എന്നിവരുള്പ്പെട്ട ഡിവിഷന് ബെഞ്ചിന്റേതാണ് ഉത്തരവ്.
ആര്മി വെല്ഫെയര് ഹൗസിംഗ് ഓര്ഗനൈസേഷന് നിര്മിച്ച സി-ടവര് ഏഴ് വര്ഷം മുമ്പാണ് ഉടമകള്ക്ക് കൈമാറിയത്. എന്നാല് അധികം വൈകാതെ കെട്ടിടം അതീവ ദുര്ബലമായി. കെട്ടിടം എപ്പോള് വേണമെങ്കിലും തകര്ന്നു വീഴാമെന്നും അടിയന്തരമായി ഒഴിപ്പിക്കണമെന്നും ദുരന്തനിവാരണ അതോറിറ്റി നേരത്തെ ഉത്തരവിട്ടിരുന്നു.
എല്ലാ താമസക്കാര്ക്കും വാടക നല്കാന് സെപ്തംബറില് കോടതി ഉത്തരവിട്ടിരുന്നെങ്കിലും ആര്മി വെല്ഫെയര് ഹൗസിംഗ് ഓര്ഗനൈസേഷന് അതില് വീഴ്ച വരുത്തി. കളക്ടര് ആവശ്യപ്പെട്ടിട്ടും പണം നല്കയില്ല. ടവറിലെ താമസക്കാരെ ഒഴിപ്പിച്ച് കെട്ടിടം പൊളിച്ചുമാറ്റി പുതിയ ടവറുകള് നിര്മിച്ചു നല്കാനുള്ള ചുമതല ജില്ലാ കളക്ടറുടെ അധ്യക്ഷതയിലുള്ള സമിതിക്കാണ് .പുതിയ കെട്ടിടം കൈമാറുന്നത് വരെയുള്ള വാടക നല്കാനുള്ള പൂര്ണ ഉത്തരവാദിത്വം ആര്മി വെല്ഫെയര് ഹൗസിംഗ് ഓര്ഗനൈസേഷന് ആണ്. നടപടികള് ഏകോപിപ്പിക്കേണ്ടത് ജില്ലാ ഭരണകൂടമാണ്.
