ചെന്നൈ: സംഗീത സംവിധായകൻ എസ് പി വെങ്കിടേഷ് അന്തരിച്ചു. ചെന്നൈയിലെ വീട്ടിലായിരുന്നു അന്ത്യം. മലയാളികളുടെ ജീവിതത്തിലേക്ക് പാട്ടുരൂപത്തില് വന്നൊരു വസന്തമാണ് എസ്.പി വെങ്കടേഷ്. സലില് ചൗധരിയെയും ബോംബെ രവിയെയും പോലെ അന്യനാട്ടില് നിന്നു വന്ന് കാവ്യാത്മക സൗന്ദര്യവും ഭാവതീക്ഷ്ണതയുമുണ്ടായിരുന്ന ഒരുപിടി വരികള്ക്ക് ഈണമിട്ട പ്രതിഭാധനന്.
സിനിമയിലെ ഗാനങ്ങള് സാഹിത്യവും സംഗീതവും ഒരുപോലെ മനോഹരമായി ഇഴചേര്ന്നതായിരിക്കണം എന്നു ശഠിച്ച, അങ്ങനെയുള്ള പാട്ടുകളോട് അടങ്ങാത്ത ആവേശമുണ്ടായിരുന്ന സംവിധായകരുടെയും നിര്മാതാക്കളുടെയും കാലത്തെ സംഗീത സംവിധായകന്. അച്ഛനില് നിന്നു പകര്ന്നു കിട്ടിയതായിരുന്നു സംഗീതം. അച്ഛന്റെ മാന്ഡലിന് മകന്റെയും ജീവനും ശ്വാസവുമായി. അധികം വൈകാതെ ഗിത്താറും ബാഞ്ചോയും പഠിച്ചെടുത്തു. 1968 മുതല്ക്കേ തമിഴിലും തെലുങ്കിലും കന്നഡയിലും മലയാളത്തിലുമായി നിരവധി ചിത്രങ്ങളുടെ ഓര്ക്കസ്ട്രയില് എസ്.പി വെങ്കടേഷുമുണ്ടായിരുന്നു.
1971ല് സംഗീത സംവിധായകന് വിജയഭാസ്കറിനൊപ്പമായിരുന്നു സിനിമയില് തുടക്കം കുറിച്ചത്, ഗിത്താര് വായിച്ചുകൊണ്ട്. 1975ല് കന്നഡ സിനിമകളില് അസിസ്റ്റന്റ് മ്യൂസിക് ഡയറക്ടറായി ചുവടുറപ്പിച്ചു. 1981ലാണ് സ്വതന്ത്ര സംഗീത സംവിധായകനാകുന്നത്. പ്രേമയുദ്ധ എന്ന തെലുങ്ക് ചിത്രത്തില്. രണ്ടു വര്ഷം കഴിഞ്ഞായിരുന്നു മലയാളത്തിലെത്തുന്നത്.
രാജാവിന്റെ മകന്, വിളംബരം, വഴിയോരക്കാഴ്ചകള്, ദൗത്യം, ഭൂമിയിലെ രാജാക്കന്മാര്, വ്യൂഹം, കുട്ടേട്ടന്, അപ്പു(പശ്ചാത്തല സംഗീതം), മഹായാനം(പശ്ചാത്തല സംഗീതം), നാടോടി, കാഴ്ചയ്ക്കപ്പുറം, എന്നോടിഷ്ടം കൂടാമോ, കിലുക്കം, ജോണി വാക്കര്, ദേവാസുരം(പശ്ചാത്തല സംഗീതം), ധ്രുവം, വാല്സല്യം, പൈതൃകം, സൈന്യം, സോപാനം, മിന്നാരം, മാന്നാര് മത്തായി സ്പീക്കിങ്, മാന്ത്രികം, സ്ഫടികം അങ്ങനെ നിരവധി ഹിറ്റുകൾ സമ്മാനിച്ച അതുല്യ പ്രതിഭയായിരുന്നു എസ് പി വെങ്കിടേഷ്.
