ന്യൂദല്‍ഹി: റിപ്പബ്ലിക് ദിനപ്പരേഡില്‍ ഇന്ത്യയുടെ അഭിമാനമായ ദീര്‍ഘദൂര ഹൈപ്പര്‍ സോണിക് ഗ്ലൈഡ് മിസൈല്‍ പ്രദര്‍ശിപ്പിക്കും..ഹൈപ്പര്‍ സോണിക് ഗ്ലൈഡ് മിസൈല്‍ വഹിച്ചുകൊണ്ടുള്ള സൈനികവാഹനം ജനുവരി 26ന് കര്‍ത്തവ്യപഥിലൂടെ നീങ്ങും. ഇന്ത്യയുടെ രാഷ്‌ട്രപതി ദ്രൗപതി മുര്‍മുവും മുഖ്യാതിഥിയായി പങ്കെടുക്കുന്ന യുറോപ്യന്‍ യൂണിയന്‍ നേതാവും യൂറോപ്യന്‍ കമ്മീഷന്‍ പ്രസിഡന്‍റുമായ ഉര്‍സുല വോന്‍ ഡെന്‍ ലെയെനും ഇത് വീക്ഷിക്കും. മാത്രമല്ല, ലോകമെങ്ങും നാവികയുദ്ധത്തില്‍ ഇന്ത്യയെ ആഗോളതലത്തിലേക്കുയര്‍ത്തുന്ന ഇന്ത്യയുടെ ബ്രഹ്മാസ്ത്രമെന്ന് വിശേഷിപ്പിക്കുന്ന ഈ മിസൈല്‍ കാണും. സാധാരണ വമ്പന്‍ശക്തികളാണ് ഹൈപ്പര്‍സോണിക് വേഗതയില്‍ കുതിക്കുന്ന ഗ്ലൈഡ് മിസൈലുകള്‍ ഉപയോഗിക്കുക.
1500 കിലോമീറ്റര്‍ വരെ ദൂരെ കടലില്‍ പോകുന്ന യുദ്ധക്കപ്പലുകളെ കൃത്യതയോടെ 15മിനിറ്റിനകം പാഞ്ഞ് ചെന്ന് തകര്‍ക്കുന്ന മിസൈലാണിത്. ബ്രഹ്മാസ്ത്ര എന്നാണ് ഹൈപ്പര്‍സോണിക് വേഗതയില്‍ കുതിക്കുന്ന ഈ മിസൈലിനെ വിളിക്കുന്നത്. ഇന്തോപസഫിക് മേഖലയില്‍ ഇന്ത്യയുടെ നിതാന്തമായ ജാഗ്രതക്കണ്ണുമായി ഈ ദീര്‍ഘദൂര കപ്പല്‍ വേധ മിസൈല്‍ (എല്‍ആര്‍എഎസ്എം) ഇനി ഉണ്ടാകും. ഇന്ത്യയുടെ പ്രതിരോധഗവേഷണകേന്ദ്രമായ ഡിആര്‍ഡിഒ ആണ് ഈ മിസൈല്‍ വികസിപ്പിച്ചത്.
എന്തുകൊണ്ട് ഗ്ലൈഡ് മിസൈല്‍ എന്ന് വിളിക്കുന്നു?
ഹൈപ്പര്‍സോണിക് വേഗതയില്‍ കുതിക്കുന്ന ഈ മിസൈലിനെ ഗ്ലൈഡ് മിസൈല്‍ എന്ന് വിളിക്കുന്നത് എന്തുകൊണ്ടാണ്? ഈ മിസൈലില്‍ നിന്നും അവസാനഘട്ടത്തില്‍ ഇതിലെ സ്ഫോടകവസ്തു വഹിക്കുന്ന പോര്‍മുന വേര്‍പെടും. അത് അപ്രതീക്ഷിതമായ മുകളിലേക്കോ താഴെയ്‌ക്കോ അതിവേഗം കുതിച്ച് ശത്രുലക്ഷ്യത്തില്‍ പതിച്ച് മാരകമായ സ്ഫോടനം ഉണ്ടാക്കും. ഈ ഹൈപ്പര്‍സോണിക് ഗ്ലൈഡ് മിസൈലിന്റെ സസ്പെന്‍സ് എന്ന് പറയുന്നത് ഒരു അപ്രതീക്ഷിതമായ പാതയിലൂടെ അവസാനനിമിഷത്തില്‍ പോര്‍മുന നടത്തുന്ന കുതിപ്പാണ്. സാധാരണ ബാലിസ്റ്റിക് മിസൈലുകള്‍ തൊടുത്തുകഴിഞ്ഞാല്‍ അര്‍ധവൃത്താകൃതിയിലാണ് സഞ്ചരിക്കുക. അതിനാല്‍ ഇതിന്റെ സഞ്ചാരപാത കൃത്യമായി പ്രവചിക്കാന്‍ സാധിക്കില്ല. ശത്രുവിന്റെ റഡാറുകളുടെയും മിസൈല്‍ വേധ സംവിധാനങ്ങളുടെയും കണ്ണുവെട്ടിക്കാന്‍ ഹൈപ്പര്‍സോണിക് ഗ്ലൈഡ് മിസൈലുകള്‍ക്ക് സാധിക്കും. അതിനാല്‍ ഗ്ലൈഡ് മിസൈലുകള്‍ ശത്രുക്കളുടെ പേടിസ്വപ്നമാണ്.
ഇന്ത്യയുടെ ആയുധആവനാഴിയിലെ ശക്തമായ ആയുധമാണ് ഹൈപ്പര്‍ ഗ്ലൈഡ് മിസൈല്‍. മണിക്കൂറില്‍ 12,144 കിലോമീറ്റര്‍ വേഗതയില്‍ കുതിക്കുന്ന മിസൈലാണിത്. അതായത് ശബ്ദത്തിന്റെ പത്ത് മടങ്ങ് വേഗതയായ മാക് 10 വേഗതയില്‍ ഈ മിസൈല്‍ കുതിക്കുമെന്നര്‍ത്ഥം.
1500 കിലോമീറ്റര്‍ വരെ അകലെയുള്ള ലക്ഷ്യസ്ഥാനത്തെ തകര്‍ക്കാന്‍ ഇതിന് കഴിവുണ്ട്. കടലില്‍ അകലെയുള്ള യുദ്ധക്കപ്പലുകള്‍, നാവികകേന്ദ്രങ്ങള്‍ എന്നിവയെ തകര്‍ക്കാനാണ് ഈ മിസൈല്‍ ഉപയോഗിക്കുന്നത്. 15 മിനിറ്റിനകം 1500 കിലോമീറ്റര്‍ അകലെയുള്ള ശത്രുലക്ഷ്യത്തെ ഭേദിച്ചിരിക്കും.
