ന്യൂദല്ഹി: ഇസ്രയേല്, ഗ്രീസ്, സൈപ്രസ് എന്നീ രാജ്യങ്ങള് 2026ല് ഒരു ത്രിരാഷ്ട്ര സൈനിക സഹകരണപദ്ധതിക്ക് തുടക്കമിടാനുള്ള തയ്യാറെടുപ്പിലാണ്. തുര്ക്കിയുടെ സാമ്രാജ്യ വികസന മോഹങ്ങളെ ചെറുക്കുക, തുര്ക്കി, സൗദി അറേബ്യ, പാകിസ്ഥാന് എന്നിവ ചേര്ന്നുള്ള നേറ്റോ മാതൃകയിലുള്ള സൈനിക ശാക്തീകരണത്തെ തടയുക എന്നിവയാണ് ലക്ഷ്യങ്ങള്.
ഇസ്രയേലും ഗ്രീസും സൈപ്രസും ഇന്ത്യയെയും ഈ കൂട്ടുകെട്ടിലേക്ക് ക്ഷണിക്കുന്നുണ്ട്. ത്രീ പ്ലസ് വണ് എന്ന് വിളിക്കപ്പെടുന്ന ഈ കുട്ടുകെട്ടില് ചേരണമോ എന്ന് ഇന്ത്യ അന്തിമതീരുമാനം ഇനിയും എടുത്തിട്ടില്ല. പക്ഷെ പാകിസ്ഥാനും സൗദിയും തുര്ക്കിയും ചേരുന്ന നേറ്റോ മാതൃകയിലുള്ള സൈനിക സഹകരണം ഇന്ത്യയ്ക്ക് ഭീഷണി തന്നെയാണ്.
പാകിസ്ഥാനെയോ സൗദിയെയോ ഏതെങ്കിലും രാജ്യം ആക്രമിച്ചാല് തുര്ക്കിയും പാകിസ്ഥാനും സൗദിയും ഒന്നിച്ച് ആ രാജ്യത്തെ സൈനികമായി എതിര്ക്കും എന്ന രീതിയില് ഒരു നേറ്റോ മാതൃകയിലുള്ള സഖ്യമുന്നണി രൂപീകരിക്കപ്പെട്ടതില് ഇസ്രയേലിനും ഉല്ക്കണ്ഠയുണ്ട്. കാരണം സൗദി അറേബ്യയുടെ പണം, പാകിസ്ഥാന്റെ ആണവ ശക്തി, തുര്ക്കിയുടെ ആധുനിക മിസൈല്, ആയുധക്കരുത്ത് എന്നിവ ചേര്ന്നുള്ളതാണ് നേറ്റോ മാതൃകയില് വരാന് പോകുന്ന പുതിയ സഖ്യം.
ഈസ്റ്റ് മെഡിറ്ററേനിയല് മുതല് ഇന്ത്യന് മഹാസമുദ്രം വരെനീളുന്നതാണ് ഈ പുതിയ ത്രിരാഷ്ട്ര ശക്തിയുടെ സ്വാധീനം. പാകിസ്ഥാന്റെ ആണവശക്തി ഗള്ഫിലേക്കും മധ്യേഷയിലേക്കും നീളുകയാണ്. അതിന് തുര്ക്കിയുടെ ആയുധശക്തിയും സൗദി അറേബ്യയുടെ ധനശക്തിയും ചേരുമ്പോള് ഇന്ത്യയ്ക്ക് ഇതിനെ അവഗണിക്കാനും കഴിയില്ല.
ഇന്ത്യയുടെ ഇസ്രയേലുമായുള്ള പ്രതിരോധബന്ധം ഒരു ദശകത്തിലെ ഏറ്റവും കരുത്തുറ്റ നിലയിലാണ്. ബാരക് 8 മിസൈല്, ഡ്രോണുകള്, റഡാറുകള്, ലോയിറ്ററിംഗ് മ്യൂനീഷന്, പുതിയ ആയുധവികസനം, സംയുക്ത സൈനിക അഭ്യാസങ്ങള്…ഇങ്ങിനെ വളരുകയാണ് ഇന്ത്യ-ഇസ്രയേല് ബന്ധം. സംയുക്ത സമുദ്രനിരീക്ഷണവും ഇന്ത്യയും ഇസ്രയേലും സംയുക്തമായി നടത്തുന്നു. ഇന്ത്യന് നാവികസേന ഇപ്പോള് വന്തോതില് മെഡിറ്ററേനിയന് കടലിലും ഇസ്രയേലുമായി സഹകരിച്ച് സൈനികാഭ്യാസം നടത്തിവരുന്നു. മുങ്ങിക്കപ്പലിനെതിരായ സൈനികാഭ്യാസം, വ്യോമപ്രതിരോധം, സംയുക്ത സമുദ്രനിരീക്ഷണം തുടങ്ങി പലകാര്യങ്ങളിലും ഇസ്രയേലും ഇന്ത്യയും യോജിച്ച് പ്രവര്ത്തിക്കുകയാണ്. അതുകൊണ്ട് മെഡിറ്ററേനിയന്റെ സുരക്ഷ ഇപ്പോള് ഇന്ത്യയുടെയും തലവേദന തന്നെയാണ്.
യുഎഇ ഈ ചിത്രത്തെ പ്രശ്നത്തെ കൂടുതല് സങ്കീര്ണ്ണമാക്കുന്നു. യുഎഇ പ്രധാനമന്ത്രി മുഹമ്മദ് ബിന് സായദിന്റെ കഴിഞ്ഞ ദിവസം നടന്ന ഇന്ത്യാ സന്ദര്ശനം ഗൗരവതരമാണ്. യെമനില് സൗദി അറേബ്യയും യുഎഇയും ഏറ്റുമുട്ടുകയാണ്. ഊര്ജ്ജം, പ്രാദേശിക സമ്പദ്ഘടന എന്നിവയാണ് ഇതിന് പിന്നില്. യുഎഇ ഇപ്പോള് നേരിടേണ്ടി വരുന്നത് സൗദിയെ മാത്രമല്ല, സൗദി-പാകിസ്ഥാന്-തുര്ക്കി എന്നീ മൂന്ന് ശക്തികള് ചേര്ന്നുള്ള പുതിയ സുന്നി മുസ്ലിം കൂട്ടുകെട്ടിനെയാണ്. അവരെ ഒറ്റയ്ക്ക് നേരിടുക യുഎഇയ്ക്ക് എളുപ്പവുമല്ല. അതിനാണ് യുഎഇ ഇന്ത്യയുടെ കൂടി സഹായം തേടുന്നത്. എന്തായാലും ഇന്ത്യയുടെ തീരുമാനം നിര്ണ്ണായകമായിരിക്കും. ഇസ്രയേലും ഗ്രീസും സൈപ്രസും ചേര്ന്നുള്ള കൂട്ടുകെട്ടിന്റെ ഭാഗമായാലേ ഇന്ത്യയ്ക്കും പാകിസ്ഥാന്റെയും തുര്ക്കിയുടെയും ഭീഷണിയെ അതിജീവിക്കാനാകൂ.
