മയിലാടുതുറൈ: അന്താരാഷ്ട്ര സമുദ്ര അതിര്ത്തി (ഐഎംബിഎല്) ലംഘിച്ചുവെന്നാരോപിച്ച് തമിഴ്നാട് സ്വദേശികളായ ഏഴ് മത്സ്യത്തൊഴിലാളികളെ ശ്രീലങ്കന് നാവികസേന അറസ്റ്റ് ചെയ്തു.
മയിലാടുതുറൈ ജില്ലയിലെ പെരുമാള്പേട്ടൈ സ്വദേശികളായ ദേവരാജ്, ശ്രീധര്, കലൈവാനന്, ശരണ്രാജ്, രാജേഷ്, സത്യ, സവീന് എന്നിവരാണ് അറസ്റ്റിലായത്. ചൊവ്വാഴ്ച ഉച്ചയ്ക്ക് രണ്ട് മണിയോടെ വേദരണ്യത്തിന് സമീപമുള്ള കൊടിയക്കരൈയില് നിന്ന് ദേവരാജിന്റെ ഉടമസ്ഥതയിലുള്ള രണ്ട് ഫൈബര് ബോട്ടുകളിലാണ് ഇവര് കടലില് പോയത്. നെടുന്തീവിനു സമീപം മത്സ്യബന്ധനം നടത്തുകയായിരുന്ന ഇവരെ പട്രോളിങ് നടത്തുകയായിരുന്ന നാവികസേന തടഞ്ഞുനിര്ത്തി സമുദ്രാതിര്ത്തി ലംഘിച്ചുവെന്നാരോപിച്ച് കസ്റ്റഡിയിലെടുക്കുകയും ബോട്ടുകള് പിടിച്ചെടുക്കുകയുമായിരുന്നു. അറസ്റ്റിലായവരെ കാങ്കേശന്തുറൈ നാവിക ക്യാമ്പിലേക്ക് കൊണ്ടുപോയി ചോദ്യം ചെയ്യല് നടത്തിയെന്നാണ് റിപ്പോര്ട്ട്.
ഈ മാസം ആദ്യം ഡെല്ഫ്റ്റ് ദ്വീപിന് സമീപമുള്ള വടക്കന് കടല് പ്രദേശത്ത് വച്ച് സമുദ്രാതിര്ത്തിയില് മത്സ്യബന്ധനം നടത്തിയെന്നാരോപിച്ച് ശ്രീലങ്കന് നാവികസേന 10 ഭാരത മത്സ്യത്തൊഴിലാളികളെ അറസ്റ്റ് ചെയ്യുകയും അവരുടെ ട്രോളര് പിടിച്ചെടുക്കുകയും ചെയ്തിരുന്നു.
