ന്യൂദല്‍ഹി: മതരാഷ്‌ട്രവാദവും ഇസ്ലാമിക റിപ്പബ്ലിക്കും തങ്ങളുടെ ആത്യന്തികലക്ഷ്യമാണെന്ന് ആവര്‍ത്തിച്ച് വ്യക്തമാക്കിയ സാഹചര്യത്തില്‍ ജമാഅത്തെ ഇസ്ലാമിയെ തള്ളിപ്പറയാന്‍ കോണ്‍ഗ്രസും പ്രതിപക്ഷനേതാവ് വി.ഡി. സതീശനും തയ്യാറാകുമോയെന്ന് ബിജെപി ദേശീയ നിര്‍വ്വാഹകസമിതി അംഗം പി.കെ. കൃഷ്ണദാസ്.
ഇസ്ലാമില്‍ വിശ്വസിക്കുന്ന ആര്‍ക്കും മതരാഷ്‌ട്രവാദത്തെ തള്ളി പ്പറയാനാവില്ലെന്ന് ജമാഅത്തെ ഇസ്ലാമി സംസ്ഥാന സെക്രട്ടറി ശൈഖ് മുഹമ്മദ് കാരക്കുന്ന് കഴിഞ്ഞദിവസം ഫെയ്സ്ബുക്ക് കുറിപ്പിലൂടെ നിസ്സംശയം പ്രഖ്യാപിച്ചിട്ടുണ്ട്. ജമാഅത്തെ ഇസ്ലാമി മതരാഷ്‌ട്രവാദം ഉപേക്ഷിച്ചെന്ന് വി.ഡി. സതീശന്‍ പറയുന്നത് എന്തടിസ്ഥാനത്തില്‍ ആണെന്ന് വ്യക്തമാക്കണമെന്നും പി.കെ. കൃഷ്ണദാസ് ആവശ്യപ്പെട്ടു. ദല്‍ഹിയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഭരണഘടനാവിരുദ്ധവും ദേശവിരുദ്ധവും നിയമ വിരുദ്ധവും മതേതരവിരുദ്ധവും ജനാധിപത്യവിരു ദ്ധവുമായ നിലപാടാണ് ജമാഅത്തെ ഇസ്ലാമിയുടേത്. മതരാഷ്‌ട്രവാദത്തോട് മുസ്ലീംലീഗിനുള്ള നിലപാട് എന്തെന്ന് അറിയാന്‍ ജനങ്ങള്‍ക്ക് ആഗ്രഹമുണ്ട്. ഭാരതത്തെ ഇസ്ലാമിക റിപ്പബ്ലിക് ആക്കാന്‍ ആഗ്രഹിക്കുകയും അതിനായി പ്രവര്‍ത്തിക്കുകയും ചെയ്യുന്ന ജമാഅത്തെ ഇസ്ലാമിയുമായും അവരുടെ രാഷ്‌ട്രീയരൂപമായ വെല്‍ഫെയര്‍ പാര്‍ട്ടിയുമായും നിയമ സഭാതെരഞ്ഞെടുപ്പില്‍ സഖ്യവും സഹകരണവും ഉണ്ടാക്കി മുന്നോട്ടുപോകാനാണ്‌കോണ്‍ഗ്രസിന്റെയും യുഡിഎഫിന്റെയും നീക്കമെന്നും കൃഷ്ണദാസ് പറഞ്ഞു.
ജമാഅത്തെ ഇസ്ലാമിയുമായി പലഘട്ടങ്ങളിലും സഖ്യമുണ്ടാക്കിയവരാണ് സിപിഎമ്മുകാര്‍. മതപരമായ കലഹവും കലാപവും സൃഷ്ടിക്കാന്‍ ഉതകുന്ന പ്രസ്താവനയാണ് ശൈഖ് കാരക്കുന്ന് നടത്തിയത്. ഈ പ്രസ്താവനയ്‌ക്കെതിരെ നിയമനടപടി സ്വീകരിക്കാന്‍ പിണറായി സര്‍ക്കാര്‍ തയാറാകണം. ജമാഅത്തെ ഇസ്ലാമിയുടെ പരിപാടിയില്‍ മന്ത്രി അബ്ദുറഹിമാന്‍ പങ്കെടുത്തത് എന്ത് അടിസ്ഥാനത്തില്‍ ആണെന്ന് സിപിഎം വ്യക്തമാക്കണം. എല്‍ഡിഎഫും യുഡിഎഫും ദേശവിരുദ്ധശക്തികളുമായി കൈകോര്‍ക്കുന്ന കാഴ്ച യാണ് കേരളത്തിലുള്ളത്. കേരള നിയമസഭ സംയുക്തമായി പാസ്സാക്കിയ ബഹുഭൂരിപക്ഷം പ്രമേയങ്ങളും ദേശീയ കാഴ്ചപ്പാടിന് വിരുദ്ധമാണ്. ഇത്തരം പ്രമേയങ്ങള്‍ പാസാക്കാന്‍ ഇടതു-വലതു മുന്നണികള്‍ക്കിടയില്‍ പാലമായത് ജമാഅത്തെ ഇസ്ലാമി, പിഎഫ്ഐ, പിഡിപി ഉള്‍പ്പെടെയുള്ളവര്‍ ആയിരുന്നുവെന്നും പി.കെ. കൃഷ്ണദാസ് ആരോപിച്ചു.
