കൊല്ലം: ശബരിമല സ്വര്ണക്കൊള്ള കേസില് തിരുവിതാംകൂര് ദേവസ്വം ബോര്ഡ് മുന് പ്രസിഡന്റ് എന്.വാസുവിന്റെ ജാമ്യാപേക്ഷ വ്യാഴാഴ്ച സുപ്രീം കോടതിയില്. ജസ്റ്റിസ് ദീപാങ്കര് ദത്ത അധ്യക്ഷനായ ബെഞ്ചാണ് ജാമ്യാപേക്ഷ പരിഗണിക്കുക. എന് വാസുവിനെ തിങ്കളാഴ്ച 14 ദിവസത്തേക്ക് വീണ്ടും കൊല്ലം വിജിലന്സ് കോടതി റിമാന്ഡ് ചെയ്തിരുന്നു.
അതിനിടെ, ശബരിമല സ്വര്ണക്കൊള്ളയില് പ്രധാന പ്രതികളുടെ സ്വത്തുക്കള് ഇ ഡി കണ്ടുകെട്ടി.1.3 കോടി വില വരുന്ന സ്വത്തുക്കളാണ് കണ്ടുകെട്ടിയത്. ശബരിമലയിലെ ആചാര അനുഷ്ഠാനങ്ങളുടെ പേരില് നടന്ന സാമ്പത്തിക തട്ടിപ്പും അന്വേഷണപരിധിയില് വരുമെന്ന് എന്ഫോഴ്സ്മെന്റ് ഡയറക്ടറേറ്റ് അറിയിച്ചു.
ഉണ്ണികൃഷ്ണന് പോറ്റിയുടെ എട്ടോളം സ്വത്തുവകകളാണ് കണ്ടുകെട്ടിയത്. ഭൂമിയുടെ രേഖകള് മരവിപ്പിച്ചു. ചെന്നൈയിലെ സ്മാര്ട്ട് ക്രിയേഷനില് നിന്ന് 100 ഗ്രാം സ്വര്ണം പിടിച്ചെടുത്തു. ചില ഉദ്യോഗസ്ഥര്ക്ക് അസ്വാഭാവിക സാമ്പത്തിക ഇടപാട് ഉണ്ടെന്നും ഇഡി അറിയിച്ചു.
