തിരുവനന്തപുരം:സര്ക്കാര് മെഡിക്കല് കോളേജുകളിലെ ഡോക്ടര്മാര് അനിശ്ചിതകാല സമരത്തിന്. മറ്റന്നാള് മുതല് അധ്യാപനം ബഹിഷ്കരിക്കുമെന്ന് കേരള മെഡിക്കല് കോളേജ് ടീച്ചേഴ്സ് അസോസിയേഷന്( കെജിഎംസിടിഎ) അറിയിച്ചു.
ഫെബ്രുവരി 2 മുതല് ഒപി ബഹിഷ്കരിക്കും.തങ്ങള് ഉന്നയിച്ച ആവശ്യങ്ങള് സര്ക്കാര് അംഗീകരിക്കാത്ത സാഹചര്യത്തിലാണ് കടുത്ത സമരത്തിലേക്ക് നീങ്ങുന്നതെന്നാണ് സംഘടന പറയുന്നത്.
സര്ക്കാര് നല്കിയ ഉറപ്പ് പാലിച്ചില്ലെന്ന് കെജിഎംസിടിഎ ആരോപിച്ചു.സംഘടനയുടെ പ്രതിനിധികളുമായി ആരോഗ്യമന്ത്രിയും ധനമന്ത്രിയും ചര്ച്ച നടത്തിയിരുന്നു. ഇതിന്റെ അടിസ്ഥാനത്തില് സംഘടന നേരത്തേ നിശ്ചയിച്ച സമരം മാറ്റിവച്ചിരുന്നു. എന്നാല് ഈ മാസം 18ന് സര്ക്കാര് ഇറക്കിയ സര്ക്കുലറില് തങ്ങളുടെ ഒരു ആവശ്യവും പരിഗണിച്ചില്ലെന്നതാണ് സര്ക്കാര് മെഡിക്കല് കോളേജ് ഡോക്ടര്മാര് സമരത്തിലേക്ക് പോകാന് കാരണം.
ജനുവരി 22 മുതല് മെഡിക്കല് കോളേജുകളിലെ അധ്യാപനം ബഹിഷ്കരിക്കും. അന്ന് തന്നെ തിരുവനന്തപുരം ഡിഎംഒ ഓഫിസിന് മുന്നിലും സംസ്ഥാനത്തെ മെഡിക്കല് കോളേജുകളിലും പ്രതിഷേധ ധര്ണ നടത്തും. ജനുവരി 27ന് സെക്രട്ടേറിയറ്റിന് മുന്നില് 10 മണി മുതല് വൈകിട്ട് ആറ് മണി വരെ പ്രതിഷേധിക്കും. ഫെബ്രുവരി 2 മുതല് ഒപി ബഹിഷ്കരണത്തിലേക്ക് നീങ്ങും. ഫെബ്രുവരി 9 മുതല് അടിയന്തര സാഹചര്യമില്ലാത്ത ശസ്ത്രക്രിയകള് ബഹിഷ്കരിക്കും. ഫെബ്രുവരി 11 മുതല് യൂണിവേഴ്സിറ്റി പരീക്ഷാ ജോലികളില് നിന്നും വിട്ടുനില്ക്കുമെന്നും കെജിഎംസിടിഎ അറിയിച്ചു.
