തിരുവനന്തപുരം: പൊതുമരാമത്ത് വകുപ്പിന്റെ കീഴിലുള്ള റോഡില്‍ നഗരസഭയുടെ ഫണ്ടില്‍ നിന്നും 2 കോടിയോളം രൂപ ചെലവഴിച്ച് നിര്‍മ്മിച്ച് മൂന്ന് വര്‍ഷത്തിനകം പൊളിച്ചുകളയുകയും ചെയ്ത വനിതാ സൗഹൃദ ഇടനാഴി വീണ്ടും പണിയണമെന്ന ആഗ്രഹവുമായി സിപിഐ നേതാവും കൗണ്‍സിലറുമായ രാഖി രവികുമാര്‍. സ്മാര്‍ട്ട് സിറ്റിയുടെ ഭാഗമായി വെള്ളയമ്പലം തൈക്കാട് റോഡ് വികസനത്തിന്റെ ഭാഗമായാണ് ഇടനാഴി പൊളിച്ചു മാറ്റിയതെന്നാണ് ഔദ്യോഗിക വിശദീകരണം.
വിമന്‍സ് കോളജിലെയും കോട്ടണ്‍ഹില്‍ ഗേള്‍സ് സ്‌കൂളിലെയും വിദ്യാര്‍ത്ഥികള്‍ക്ക് സുരക്ഷിത യാത്രയൊരുക്കുകയെന്ന ലക്ഷ്യത്തോടെയാണ് പദ്ധതി വിഭാവനം ചെയ്തത്. ബേക്കറി ജംഗ്ഷന്‍ മുതല്‍ വിമന്‍സ് കോളജ് വരെയും കോട്ടണ്‍ഹില്‍ സ്‌കൂളിനു മുന്നിലും ക്യാമറ സ്ഥാപിക്കല്‍, ഫുട്പാത്ത് നിര്‍മാണം, സോളാര്‍ പാനല്‍ സ്ഥാപിക്കല്‍, ബസ് ഷെല്‍ട്ടര്‍ നിര്‍മാണം തുടങ്ങിയവയ്‌ക്കായാണ് 90,533,24 രൂപ വകയിരുത്തിയത്. എന്നാല്‍ എസ്റ്റിമേറ്റ് തുക കൂട്ടിക്കാണിക്കാനായി ഹാന്‍ഡ് റെയില്‍ സ്ഥാപിക്കാന്‍ ഗാല്‍വനൈസ്ഡ് അയണ്‍ പൈപ്പ് ഉപയോഗിക്കുന്നതിന് പകരം സ്‌റ്റെയിന്‍ലെസ് സ്റ്റീലും മേല്‍ക്കൂര നിര്‍മ്മാണത്തിന് പോളി കാര്‍ബണേറ്റ് ഷീറ്റുകളുമാക്കി റിവൈസ്ഡ് എസ്റ്റിമേറ്റ് തയാറാക്കിയതോടെ തുക ഇരട്ടിയായി. കൂടാതെ വനിതാ നേതാക്കളുടെ ചിത്രങ്ങള്‍ ചുമരില്‍ പതിപ്പിക്കാന്‍ 20 ലക്ഷം രൂപയും കണക്കാക്കിയതോടെ എസ്റ്റിമേറ്റ് തുക രണ്ടുകോടിയായി.
2020ലെ തദ്ദേശ തെരഞ്ഞെടുപ്പ് വിജ്ഞാപനം വരുന്നതിനു തൊട്ടുമുമ്പ് ഉദ്ഘാടനം നടത്തിയ വനിതാ സൗഹൃദ ഇടനാഴിയുടെ പിന്നില്‍ പ്രവര്‍ത്തിച്ചത് അന്നത്തെ വഴുതക്കാട് വാര്‍ഡ് കൗണ്‍സിലറും ഡെപ്യൂട്ടി മേയറുമായിരുന്ന രാഖി രവികുമാറും മരാമത്ത് സ്റ്റാന്റിംഗ് കമ്മറ്റി ചെയര്‍പേഴ്‌സണായിരുന്ന എസ്. പുഷ്പലതയുമായിരുന്നു. കെ. ശ്രീകുമാറായിരുന്നു മേയര്‍. 90.53 ലക്ഷം വകയിരുത്തിയ പദ്ധതിയുടെ പേരില്‍ കരാറുകാര്‍ കൈപ്പറ്റിയത് രണ്ടു കോടിയോളം രൂപ. പണി പൂര്‍ത്തിയാക്കും മുമ്പ് തന്നെ മുഴുവന്‍ തുകയും കരാറുകാര്‍ കൈപ്പറ്റുകയും ചെയ്തു.
എന്നാല്‍ കരാറില്‍ പറഞ്ഞിരുന്ന പണികളൊന്നും തന്നെ ചെയ്തിരുന്നില്ല. മാത്രമല്ല വിമന്‍സ് കോളജിന്റെ പ്രധാന ഗേറ്റ് മുതല്‍ വഴുതയ്‌ക്കാട് ഭാഗത്തെ ഗേറ്റ് വരെ ഏകദേശം 500 മീറ്റര്‍ നീളത്തില്‍ മാത്രമേ മേല്‍ക്കൂര സ്ഥാപിച്ചുള്ളൂ. 4 യൂണിറ്റ് സോളര്‍ പാനലുകള്‍ മാത്രമാണ് സ്ഥാപിച്ചത്. പൊതുമരാമത്ത് വകുപ്പ് മുമ്പ് സ്ഥാപിച്ച ഫുട്പാത്ത് ടൈലുകളും ഹാന്‍ഡ് റെയിലുകളും അതേപടി നിലനിര്‍ത്തി. ഇതിനും കോര്‍പ്പറേഷനിലെ കരാറുകാരന് ബില്‍ തയ്യാറാക്കി. ക്യാമറയോ ബസ് ഷെല്‍റ്ററോ സ്ഥാപിച്ചില്ല. കോട്ടണ്‍ഹില്‍ സ്‌കൂളിനു മുന്നില്‍ ഒരു നിര്‍മ്മാണവും നടത്തിയില്ല. കരാര്‍ പ്രകാരമുള്ള ഒരു ജോലിയും ചെയ്യാതെയാണ് വകയിരുത്തിയ തുകയുടെ ഇരട്ടിപ്പണം കരാറുകാരനെ മുന്നില്‍ നിര്‍ത്തി ചിലര്‍ വിഴുങ്ങിയത്.
അമ്പത് ലക്ഷം രൂപ പോലും ചെലവഴിക്കാത്ത ഇടനാഴി നിര്‍മാണത്തിന് രണ്ടുകോടിയോളം രൂപ കരാറുകാര്‍ കൈപ്പറ്റുന്നത്. കോട്ടണ്‍ഹില്‍ സ്‌കൂളിന് മുന്‍ഭാഗം കരാര്‍ പ്രകാരമുള്ള ഒരു നിര്‍മാണ പ്രവര്‍ത്തനവും നടത്തിയില്ല. അനധികൃതമായി നാലിരട്ടി തുക കരാറുകാരന് നല്‍കിയ സംഭവം പുറത്ത് വന്നതോടെ എന്‍ജിനീയറിങ് വിഭാഗത്തില്‍ നിന്ന് ഇത് സംബന്ധിച്ച ഫയലും കാണാതായി.
എന്നാല്‍ വനിത സൗഹൃദ ഇടനാഴി വിണ്ടും പണിയണമെന്നതാണ് തന്റെ ആഗ്രഹമെന്ന് വഴുതക്കാട് വാര്‍ഡില്‍ നിന്നും വീണ്ടും തെരഞ്ഞെടുക്കപ്പെട്ട രാഖി രവികുമാര്‍ പറയുന്നു. രണ്ട്‌കോടി മുടക്കി പണിത് മൂന്ന് വര്‍ഷത്തിനകം പൊളിച്ച, അടിമുടി അഴിമതി നിറഞ്ഞ വനിത സൗഹൃദ ഇടനാഴി വീണ്ടും പണിയുമെന്ന രാഖി രവികുമാറിന്റെ പ്രഖ്യാപനത്തെ വാര്‍ഡിലെ ജനങ്ങള്‍ പക്ഷേ പിന്തുണയ്‌ക്കുന്നില്ല.
ജന്മഭൂമി ഓണ്‍ലൈന്‍