പുരോഹിതനായ പിതാവിന്റെ ശിക്ഷണത്തില് ആദ്യ പാഠങ്ങള് അഭ്യസിച്ച് 64-മത് സംസ്ഥാന സ്കൂള് കലോത്സവത്തിന്റെ മോണോ ആക്ട് വേദിയിലെത്തി എറണാകുളം സ്വദേശി അലോഖ എസ് ഫ്ലോറിയ. എറണാകുളം ജില്ലയില് നിന്ന് അപ്പീലിലൂടെ മോണോ ആക്ടില് എ ഗ്രേഡ് നേടിയാണ് അലോഖ സംസ്ഥാന സ്കൂള് കലോത്സവ വേദിയിലേക്ക് എത്തുന്നത്. എറണാകുളം രവിപുരം ലൂഥറന് ചര്ച്ചിലെ ഇടവക വികാരി ഫാദര് സന്തോഷ് രാജാണ് മോണോ ആക്ടിലും കലയിലും അലോഖയുടെ ആദ്യഗുരു.
പിന്നീട് തന്റെ കഴിവ് തേച്ച് മിനുക്കാന് മറ്റ് അധ്യാപകര് ഉണ്ടായെങ്കിലും ഇപ്പോഴും ഏകാഭിനയത്തിന്റെ പെര്ഫെക്ട് ടച്ച് അച്ഛനായ ‘അച്ചന്’ തന്നെ. എറണാകുളം ഗവണ്മെന്റ് ഗേള്സ് ഹൈസ്കൂളിലെ പത്താം ക്ലാസ് വിദ്യാര്ത്ഥിനിയാണ് അലോഖ. രണ്ട് പ്രാവശ്യം ജില്ലയില് മോണോ ആക്ട് ഒന്നാം സ്ഥാനം കരസ്ഥമാക്കിയിട്ടുണ്ട്. സംവിധായകന് പ്രിയനന്ദനന്റെ ഏഴ് നിറങ്ങളുള്ള സ്വപ്നം എന്ന പുതിയ സിനിമയില് കുയിലി എന്ന പ്രധാന കഥാപാത്രത്തെ അവതരിപ്പിച്ചത് അലോഖയാണ്. സിനിമ ജൂണില് തിയറ്ററുകളില് എത്തും.
വിഷ്ണു മോഹന് സംവിധാനം ചെയ്ത ‘കഥ ഇന്നുവരെ’, ആലപ്പി സുദര്ശന് സംവിധാനം ചെയ്ത കുട്ടിക്കാലം തുടങ്ങിയ സിനിമകളിലും ആക്ടര് ഇര്ഷാദ് അലിയോടൊപ്പം ഹിസ്റ്ററി എന്ന ഷോര്ട്ട് ഫിലിമിലും ശ്രദ്ധേയമായ വേഷങ്ങള് ചെയ്തു.
എറണാകുളം ചങ്ങമ്പുഴ പാര്ക്കിലെ നാം ചില്ഡ്രന്സ് തിയറ്ററില് അംഗമായ അലോഖ നിരവധി അമച്വര് നാടകങ്ങളിലും അഭിനയിച്ചിട്ടുണ്ട്. സ്കൂളിലെ മലയാളം അധ്യാപകന് വിഷ്ണുരാജ് സി.എസ് സംവിധാനം ചെയ്ത സ്വപ്നലോകത്തിലെ കിറുക്കന്മാര് എന്ന നാടകം ജില്ലയില് രണ്ടാം സ്ഥാനം കരസ്ഥമാക്കി. പ്രശസ്ത കാഥികന് ഇടക്കൊച്ചി സലിംകുമാറിന്റെ ശിക്ഷ്യ കൂടിയായ അലോഖ നിരവധി വേദികളില് കഥാപ്രസംഗം അവതരിപ്പിച്ചും കഴിവ് തെളിയിച്ചിട്ടുണ്ട്.
