തൃശ്ശൂര്‍: പങ്കെടുത്ത നാല് ഇനങ്ങളിലും എ ഗ്രേഡ് നേടി പാര്‍വ്വതി പാലയൂര്‍. ഹയര്‍ സെക്കന്ററി വിഭാഗം മലയാളം പദ്യംചൊല്ലല്‍, സംസ്‌കൃതം പദ്യംചൊല്ലല്‍, നാടന്‍പാട്ട്, കഥകളി സംഗീതം എന്നീ ഇനങ്ങളിലാണ് പാര്‍വ്വതിയുടെ നേട്ടം. ചെറുപ്രായം മുതല്‍ സംഗീതലോകത്തിന്റെ ഭാഗമാണ് പാര്‍വതി. 10 വര്‍ഷത്തോളം കഥകളി സംഗീതത്തിലും ശാസ്ത്രീയ സംഗീതത്തിലും പ്രമുഖരായ സംഗീതജ്ഞരുടെ കീഴില്‍ പഠനം നടത്തിവരുന്നു. എട്ടു വര്‍ഷക്കാലം കലാമണ്ഡലം നാരായണന്‍ എമ്പ്രാന്തിരിയുടെ കീഴില്‍ കഥകളിസംഗീതം അഭ്യസിച്ചു. ഒരു വര്‍ഷത്തോളമായി ദീപ പാലനാടിന്റെ ശിഷ്യയാണ്.
2022 ലെ കലാമണ്ഡലം ഉണ്ണികൃഷ്ണക്കുറുപ്പ് സ്മാരക കഥകളി സംഗീത മത്സരത്തില്‍ ഒന്നാം സമ്മാനം ലഭിച്ചു. അതേവര്‍ഷം തന്നെ മെഹ്ഫില്‍ ഇന്റര്‍നാഷണല്‍ ഇന്‍ഡോ അറബ് വീഡിയോ ആല്‍ബം ഫെസ്റ്റ്‌ലെ ബെസ്റ്റ് ഫിമെയില്‍ സിംഗര്‍ അവാര്‍ഡ്, മാതേവരേ എന്ന ആല്‍ബത്തിലെ പാട്ടിന് കലാമണ്ഡലം രവീന്ദ്രന്‍ സ്മാരക അവാര്‍ഡ് എന്നിവ ലഭിച്ചു. കഴിഞ്ഞ സംസ്ഥാന സ്‌കൂള്‍ കലോത്സവത്തിലും കഥകളി സംഗീതത്തില്‍ എ ഗ്രേഡ് ലഭിച്ചിരുന്നു.
നാടന്‍ പാട്ടില്‍ കേരളത്തിലെ തന്നെ പ്രശസ്ത നാടന്‍പാട്ട് കലാകാരനായ അഭിജിത് സേതു ആണ് നാടന്‍പാട്ട് പരിശീലകന്‍. ഈ അധ്യയന വര്‍ഷത്തില്‍ കേരളമാകെ കോളിളക്കം സൃഷ്ടിച്ച വിഷ്ണുമായ സ്വാമിയുടെ കളമെഴുത്തു പാട്ടാണ് നാടന്‍പാട്ടില്‍ അവതരിപ്പിച്ചത്. ഒല്ലൂര്‍ സ്വദേശയായ ശങ്കരനാരായണന്‍ നമ്പൂതിരിയുടെയും ആരതിയുടെയും മകളാണ് പാര്‍വതി. സഹോദരി ഉമാ ദേവി.
