ന്യൂദല്‍ഹി : പത്തനംതിട്ട ജില്ലയിലെ ഏക റെയില്‍വേ സ്റ്റേഷന് എന്ന നിലയില്‍ തിരുവല്ല റെയില്‍വേ സ്റ്റേഷന് പ്രത്യേക പരിഗണന നല്‍കി വികസിപ്പിക്കണമെന്ന് അഭ്യര്‍ത്ഥിച്ചുള്ള സമഗ്ര വികസന പദ്ധതി റിപ്പോര്‍ട്ട് റെയില്‍വേ മന്ത്രി അശ്വിനി വൈഷ്ണവിന് കൈമാറി ബി ജെ പി സംസ്ഥാന ജനറല്‍ സെക്രട്ടറി അനൂപ് ആന്റണി.ശബരിമല സ്ഥിതി ചെയ്യുന്ന ജില്ലയുടെ ഏക റെയില്‍വേ സ്റ്റേഷന് എന്ന നിലയില്‍ തിരുവല്ലയില്‍ തീര്‍ത്ഥാടകര്‍ക്കാവശ്യമായ പ്രത്യേക സൗകര്യങ്ങള്‍ ഒരുക്കി വിപുലമായി വികസിപ്പിക്കണം.
ശബരിമലയോടൊപ്പം ചക്കുളത്തുകാവ്, ദക്ഷിണ തിരുപ്പതി ശ്രീവല്ലഭ ക്ഷേത്രം, പരുമല പള്ളി, മാരാമണ്‍ കണ്‍വെന്‍ഷന്‍, നിരണം പള്ളി, മലയാലപ്പുഴ ക്ഷേത്രം, എടത്വ പള്ളി എന്നിവ ഉള്‍പ്പെടെയുള്ള നിരവധി തീര്‍ത്ഥാടന കേന്ദ്രങ്ങളിലേക്കുള്ള വിശ്വാസികളുടെ വലിയ വരവ് കണക്കിലെടുത്ത് വികസന പ്രവര്‍ത്തനങ്ങള്‍ ആസൂത്രണം ചെയ്യണമെന്നും കേന്ദ്ര മന്ത്രിയോട് ആവശ്യപ്പെട്ടതായി അനൂപ് ആന്റണി സമൂഹമാധ്യമത്തിലെ കുറിപ്പില്‍ പറഞ്ഞു.ആരോഗ്യ-വിദ്യാഭ്യാസ നഗരിയായി നില കൊള്ളുന്ന തിരുവല്ലയുടെ വികസനത്തില്‍ തിരുവല്ല റെയില്‍വേ സ്റ്റേഷനുള്ള പ്രാധാന്യവും മന്ത്രിയുടെ ശ്രദ്ധയില്‍പ്പെടുത്തി.റെയില്‍വേയുടെ ഉടമസ്ഥതയില്‍ തിരുവല്ലയില്‍ നിലവിലുള്ള വലിയ സ്ഥലവിസ്തീര്‍ണം ഈ വികസന പ്രവര്‍ത്തനങ്ങള്‍ക്കായി ഫലപ്രദമായി ഉപയോഗപ്പെടുത്താന്‍ കഴിയും. വന്ദേ ഭാരത് സര്‍വീസുകള്‍ക്കും അമൃത എക്‌സ്പ്രസിനും തിരുവല്ലയില്‍ സ്റ്റോപ്പ് അനുവദിക്കണമെന്നും അഭ്യര്‍ത്ഥിച്ചതായി അനൂപ് ആന്റണി അറിയിച്ചു.
ഈ വിഷയങ്ങളില്‍ റെയില്‍വേ മന്ത്രാലയത്തിന്റെ ഭാഗത്തുനിന്ന് അനുകൂല നടപടികള്‍ സ്വീകരിക്കുമെന്ന് റെയില്‍വേ മന്ത്രി ഉറപ്പ് നല്‍കിയെന്നും അദ്ദേഹം കുറിച്ചു.
