പത്തനംതിട്ട: ശബരിമല സ്വര്‍ണക്കൊള്ള കേസില്‍ ദേവസ്വം ബോര്‍ഡ് മുന്‍ പ്രസിഡന്റ് പി.എസ്. പ്രശാന്തിനെ വീണ്ടും ചോദ്യം ചെയ്യാന്‍ എസ്‌ഐടി. ഇതിനകം രണ്ടു തവണ ചോദ്യം ചെയ്ത പ്രശാന്തിന് മൂന്നാം ചോദ്യം ചെയ്യല്‍ കുരുക്കാകും. അറസ്റ്റിനും സാധ്യത. ഒപ്പം 2023-25ലെ ബോര്‍ഡ് അംഗങ്ങളെയും ചോദ്യം ചെയ്യും. ഇതിന്റെ ഭാഗമായി സിപിഐ പ്രതിനിധി അംഗം അജികുമാറിനെ വൈകാതെ എസ്‌ഐടി ആസ്ഥാനത്തേക്ക് വിളിച്ചുവരുത്തും.
എല്ലാ നിയമങ്ങളും പാലിച്ചാണ് ദ്വാരപാലക പാളികള്‍ വീണ്ടും സ്വര്‍ണം പൂശാന്‍ ഉണ്ണികൃഷ്ണന്‍ പോറ്റി വശം 2025 സപ്തംബര്‍ ഏഴിന് ചെന്നൈക്ക് കൊടുത്തുവിട്ടതെന്നാണ് പ്രശന്ത് പറയുന്നത്. എന്നാല്‍ പ്രശാന്തിനെ പ്രതിയാക്കാന്‍ നിരവധി കാര്യങ്ങളുണ്ടെന്ന് എസ്‌ഐടി കരുതുന്നു. സ്വര്‍ണം പൂശുന്നതിന് യോഗ്യതയുള്ള സ്ഥാപനം ദക്ഷിണേന്ത്യയിലില്ലെന്ന് വ്യക്തമാക്കി 2024 ജൂലൈ നാലിന് തിരുവാഭരണ കമ്മിഷണര്‍ ഇറക്കിയ ആര്‍ഒസി 71/21/ ടിഎന്‍ നമ്പര്‍ റിപ്പോര്‍ട്ട് അടിസ്ഥാനത്തില്‍ ദേവസ്വം ബോര്‍ഡ് ഇറക്കിയ ആര്‍ഒസി 11258/21/ എം ഉത്തരവ് നിലനില്‍ക്കേ എന്തുകൊണ്ട് സ്വര്‍ണം പൂശാന്‍ സ്മാര്‍ട്ട് ക്രിയേഷന്‍സിലേക്കു തന്നെ ദ്വാരപാലക പാളികള്‍ കൊടുത്തു വിട്ടുവെന്നതാണ് പ്രധാന ചോദ്യം. തിരുവാഭരണ കമ്മിഷണറുടെ കണ്ടെത്തല്‍ ശരിവച്ചാണ് പ്രശാന്ത് അധ്യക്ഷനായ ബോര്‍ഡ് ഉത്തരവിറക്കിയതെന്നതും ശ്രദ്ധേയം.
ജന്മഭൂമി ഓണ്‍ലൈന്‍