തിരുവനന്തപുരം: ശബരിമല സ്വര്ണക്കൊളള കേസില് പ്രതിസ്ഥാനത്തുളള തന്ത്രി കണ്ഠരര് രാജീവരുടെ വീട്ടില് നിന്നും കണ്ടെത്തിയ വാജിവാഹനം കോടതിയില് നല്കി പ്രത്യേക അന്വേഷണ സംഘം. കൊല്ലം വിജിലന്സ് കോടതിയിലാണ് വാജിവാഹനം നല്കിയത്. പഴയ കൊടിമരത്തിലെ വാജിവാഹനം തന്ത്രി കണ്ഠരര് രാജീവര് കൈവശം വച്ചിരിക്കുകയായിരുന്നു. വര്ഷങ്ങള് പഴക്കമുള്ള വാജിവാഹനം 11കിലോ തൂക്കം വരുന്ന പഞ്ചലോഹത്തില് സ്വര്ണം പൊതിഞ്ഞതാണ്.
പുതിയ കൊടിമരം സ്ഥാപിച്ചപ്പോഴാണ് 2017ല് വളരെ മൂല്യമുള്ള വാജിവാഹനം തന്ത്രി വീട്ടിലേക്ക് കൊണ്ടുപോയത്.ഇത് വിവാദമായിരുന്നു. സ്വര്ണക്കൊളള കേസ് വന്നതോടെ വാജി വാഹനം തിരികെ നല്കാന് തയാറാണെന്ന് തന്ത്രി ദേവസ്വം ബോര്ഡിനെ അറിയിച്ചിരുന്നു.കട്ടിളപ്പാളി കേസില് തന്ത്രിയെ അറസ്റ്റ് ചെയ്തതിന് ശേഷം പ്രത്യേക അന്വേഷണ സംഘം തന്ത്രിയുടെ വീട്ടില് പരിശോധന നടത്തി വാജിവാഹനം കണ്ടെത്തി കസ്റ്റഡിയില് എടുക്കുകയായിരുന്നു.
അതേസമയം, ശബരിമല ദ്വാരപാലക ശില്പ്പ കേസിലും തന്ത്രി കണ്ഠരര് രാജീവരെ അറസ്റ്റ് ചെയ്യാന് പ്രത്യേക അന്വേഷണ സംഘത്തിന് ഇന്ന് കോടതി അനുമതി നല്കി. തന്ത്രിക്ക് തട്ടിപ്പില് ബന്ധമുണ്ടെന്ന റിപ്പോര്ട്ട് കൊല്ലം വിജിലന്സ് കോടതിയില് നല്കിയിട്ടുണ്ട്. സ്വര്ണം ചെമ്പാക്കിയ വ്യാജ മഹസറില് തന്ത്രി ഒപ്പിട്ട് ഗൂഡാലോചനയില് പങ്കാളിയായെന്ന് പ്രത്യേക അന്വേഷണ സംഘം കോടതിയെ അറിയിച്ചു. കട്ടിളപാളി കടത്തിയ കേസിലാണ് തന്ത്രിയെ അറസ്റ്റ് ചെയ്തത്. തന്ത്രിയുടെ ജാമ്യാപേക്ഷ 19ലേക്ക് മാറ്റി. മുന് ദേവസ്വം ബോര്ഡ് മുന് പ്രസിഡന്റ് എ.പത്മകുമാറിന്റൈ റിമാന്ഡ് കാലാവധി ഈ മാസം 27വരെ നീട്ടി.
