മുംബൈ: “ദേവി എന്റെയുള്ളിവും പ്രവേശിക്കുകയായിരുന്നു. അത് എന്റെ ജീവിതത്തിലെ ഏറ്റവും ആനന്ദകരമായ നിമിഷമായിരുന്നു”- കഴിഞ്ഞ ദിവസം വീട്ടില്‍ സംഘടിപ്പിച്ച പൂജയില്‍ ഭ്രാന്തമായി പെരുമാറിയതിനെക്കുറിച്ച് വിശദീകകരണം നല്‍കി സുധാചന്ദ്രന്‍.
എല്ലാവരേയും ആശങ്കപ്പെടുത്തുന്ന രീതിയില്‍ കഴിഞ്ഞ ദിവസം സുധാചന്ദ്രന്‍റേതായി പുറത്തിറങ്ങിയ ഒരു വീഡിയോ വൈറലായിരുന്നു. നോര്‍ത്ത് ഇന്ത്യയില്‍ ഹൈന്ദവ വിശ്വാസപ്രകാരം നടത്തപ്പെടുന്ന ഒരു ആഘോഷമാണ് മാതാ കി ഭക്തി. പ്രപഞ്ചത്തിന്റെ മാതാവായി കരുതപ്പെടുന്ന ദുര്‍ഗ്ഗ, ലക്ഷ്മി, സരസ്വതി, കാളി തുടങ്ങിയ ദേവീരൂപങ്ങളോടുള്ള വിശ്വാസവും ആരാധനയും പ്രകടമാക്കുന്ന ആഘോഷമാണിത്. സുധയുടെ വീട്ടിലും ഇത്തരം മാതാകി ഭക്തി ആഘോഷം സംഘടിപ്പിക്കുകയുണ്ടായി. ഈ ആഘോഷത്തിന്റെ തുടക്കത്തില്‍ സുധയും നൃത്തം ചെയ്യുകയും പാടുകയുമൊക്കെ ചെയ്തുകൊണ്ടിരിക്കുകയാണ്. പെട്ടന്നാണ് മറ്റൊരാളുടെ നൃത്തം കണ്ടു നിന്നുകൊണ്ടിരിക്കെ സുധ ചന്ദ്രനില്‍ മാറ്റമുണ്ടായത്. തീവ്രമായ വൈകാരിക മാറ്റമായിരുന്നു അത്. പിന്നീട് ചുറ്റും നിന്നവര്‍ക്ക് സുധ ചന്ദ്രയെ നിയന്ത്രിക്കാന്‍ കഴിയാതെയാവുന്നു. പിടിച്ചു നിര്‍ത്താന്‍ ശ്രമിക്കുന്നവരെ സുധ കടിക്കാന്‍ ശ്രമിക്കുന്നതായും കാണാം.
ഈ വീഡിയോയ്‌ക്കെതിരെ നിറയെ ട്രോളുകള്‍ ഉയര്‍ന്നിരുന്നു. ഈ ട്രോളുകള്‍ക്ക് മറുപടി പറയുകയാണ് ഇപ്പോള്‍ സുധാ ചന്ദ്രന്‍. “ഭക്തി എന്നത് ഒരു വ്യക്തിപരമായ കാര്യമാണ്. ഭക്തിയുടെ പേരില്‍ ആരെയും വിചാരണചെയ്യാനോ വിമര്‍ശിക്കാനോ ഞാനില്ല. ട്രോളുകള്‍ക്ക് മറുപടി പറയാന്‍ ഞാനില്ല. സ്വന്തം അധ്വാനത്തില്‍ ഉര്‍ന്നുവന്ന വ്യക്തിയാണ് ഞാന്‍. “- ഭക്തിയുടെ ആവേശത്തിലാണ് താന്‍ ഭ്രാന്തമായി പെരുമാറിയതെന്ന വിശദീകരണം നല്‍കി സുധാചന്ദ്രന്‍ പറഞ്ഞു.
പതിനാറാം വയസ്സില്‍ കാല് നഷ്ടപ്പെട്ടിട്ടും, കൃത്രിമമായ കാല് വച്ച് നൃത്തം ചെയ്ത് ജീവിതത്തോടു പോരാടിയ വ്യക്തിയാണ് സുധാചന്ദ്രന്‍. പിന്നീട് ടിവി സീരിയലുകളില്‍ തിളങ്ങി. സ്വന്തം ജീവിതകഥയെ ആസ്പദമാക്കി നിര്‍മ്മിച്ച മയൂരി എന്ന സിനിമ ദേശീയ ഹിറ്റ് ആയിരുന്നു. സുധാചന്ദ്രന്‍ തന്നെയായിരുന്നു നായിക.
