മകളുടെ അരങ്ങേറ്റ വിഡിയോ പങ്കുവച്ച് നടി മേനക സുരേഷ് സോഷ്യൽ മീഡിയയിൽ കുറിച്ച വാക്കുകളാണ് ഇപ്പോൾ പ്രേക്ഷകർക്കിടയിൽ ശ്രദ്ധേയമാകുന്നത്. പെൺകുട്ടികൾ ചെണ്ട പഠിക്കുന്നതും അരങ്ങേറ്റം കുറിക്കുന്നതും ഇന്ന് സാധാരണമാണ്. എന്നാൽ താര കുടുംബത്തിൽ നിന്നും ഈ മേഖലയിലേക്ക് എത്തുന്നത് വളരെ അപൂർവ്വമാണ്. ജനം ടിവി എക്സിക്യൂട്ടിവ് ചെയർമാനും ചലച്ചിത്ര നിർമാതാവുമായ സുരേഷ് കുമാറിന്റെയും മേനകയുടെയും മൂത്തമകൾ രേവതി സുരേഷ് ചെണ്ടയിൽ അരങ്ങേറ്റം കുറിച്ചിരിക്കുന്നത്.
തിരുവനന്തപുരം ആറ്റുകാൽ ദേവീക്ഷേത്രത്തിൽ വെച്ചുനടന്ന ചടങ്ങിന്റെ വീഡിയോയും മേനക സുരേഷ് പങ്കുവെച്ചിട്ടുണ്ട്. ‘എന്റെ മകൾ രേവതി സുരേഷിന്റെ ചെണ്ട അരങ്ങേറ്റം ആറ്റുകാൽ ദേവീക്ഷേത്രത്തിൽ’ എന്ന കുറിപ്പോടെയാണ് വീഡിയോ പങ്കുവെച്ചിരിക്കുന്നത്. സിനിമാ- സാംസ്കാരിക രംഗത്തെ നിരവധി പേരാണ് രേവതിക്ക് ആശംസയുമായി എത്തിയത്.
രേവതി കലാമന്ദിർ ഫിലിം അക്കാദമിയുടെ അമരക്കാരിയായ രേവതി മികച്ച നർത്തകി കൂടിയാണ്. പ്രമുഖ നർത്തകി ഡോ. പത്മ സുബ്രഹ്മണ്യത്തിന്റെ ശിഷ്യ കൂടിയാണ് അവർ. മാതാപിതാക്കളെ പോലെ സിനിമ രംഗത്തും രേവതി കഴിവ് തെളിയിച്ചിട്ടുണ്ട്. വർഷങ്ങളോളം സംവിധായകൻ പ്രിയദർശന്റെ സംവിധാന സഹായായിരുന്നു. ‘താങ്ക് യു’ എന്ന ഹ്രസ്വചിത്രത്തിലൂടെ സംവിധാന രംഗത്ത് രേവതി അരങ്ങേറ്റം കുറിച്ചത്. വിഷ്വൽ എഫക്ട് ആർടിസ്റ്റായ രേവതി, മരക്കാർ അറബിക്കടലിന്റെ സിംഹം, വാശി, മോഹൻലാൽ ചിത്രം ബാറോസ് തുടങ്ങിയ സിനിമകളിൽ പ്രവർത്തിച്ചിട്ടുണ്ട്. ഒപ്പം നിരവധി ബോളിവുഡ് ചിത്രങ്ങളുടെ ഭാഗമാവുകയും ചെയ്തു.
