മുംബൈ: ന്യൂസിലന്‍ഡിനെതിരായ ഏകദിന പരമ്പരയ്‌ക്കുള്ള ഭാരത ടീമിനെ ഇന്ന് പ്രഖ്യാപിക്കും. പുതുവര്‍ഷത്തില്‍ ബിസിസിഐ സെലര്‍കര്‍മാര്‍ ആദ്യമായി കുടിച്ചേരുന്നുവെന്ന പ്രത്യേകത കൂടി ഇന്നത്തെ ടീം പ്രഖ്യാപനത്തിനുണ്ട്. പേസ് ബൗളര്‍മാരായ ജസ്പ്രീത് ബുംറയും ഹാര്‍ദിക് പാണ്ഡ്യയും ഉണ്ടാവില്ലെന്ന് ദിവസങ്ങള്‍ക്ക് മുമ്പേ അറിയിച്ചിരുന്നു. ട്വന്റി20 ലോകകപ്പ് മുന്നില്‍ കണ്ട് സജ്ജരാകാനായി ഇരുവര്‍ക്കും വിശ്രമം അനുവദിക്കുകയായിരുന്നു.
ഭാരത പര്യടനത്തിനെത്തുന്ന ന്യൂസിലന്‍ഡിനെതിരെ മൂന്ന് മത്സര ഏകദിന പരമ്പരയും അഞ്ച് മത്സര ട്വന്റി20 പരമ്പരയുമാണ് കളിക്കേണ്ടത്. ആദ്യം ഏകദിന പരമ്പരയാണ് നടക്കുക. വരുന്ന 11, 14, 18 തീയതികളിലായാണ് മത്സരങ്ങള്‍. ഏകദിനത്തിനായുള്ള ടീമിനെ മാത്രമാണ് ഇന്ന് പ്രഖ്യാപിക്കുക. ശുഭ്മാന്‍ ഗില്‍ ക്യാപ്റ്റന്‍ സ്ഥാനത്ത് തിരിച്ചെത്തിയേക്കുമെന്നറിയുന്നു. ദക്ഷിണാഫ്രിക്കയ്‌ക്കെതിരായ ടെസ്റ്റ് പരമ്പരയ്‌ക്കിടെയാണ് ഗില്‍ കഴുത്തുവേദനയെ തുടര്‍ന്ന് വിശ്രമത്തിലായത്. ആഴ്‌ച്ചകളായി ഗില്‍ പരിക്കില്‍ നിന്നെല്ലാം മുക്തനായിട്ടുണ്ട്.
രണ്ട് വര്‍ഷത്തെ ഇടവേളയ്‌ക്ക് ശേഷം ഇഷാന്‍ കിഷന്‍ ടീമില്‍ തിരിച്ചെത്തുമെന്ന് സൂചനകളുണ്ട്.
2023 ഏകദിന ലോകകപ്പിലാണ് ഇഷാന്‍ ഏറ്റവും ഒടുവിലായി ഭാരത ടീമിന് വേണ്ടി കളിച്ചത്. സമീപകാലത്ത് ആഭ്യന്തര ക്രിക്കറ്റില്‍ മികച്ച കളിയാണ് ഇഷാന്‍ കാഴ്‌ച്ചവച്ച് വരുന്നത്. ദിവസങ്ങള്‍ക്ക് മുമ്പ് വിജയ് ഹസാരെ ട്രോഫി ദേശീയ ഏകദിന ക്രിക്കറ്റില്‍ ഇഷാന്‍ അതിവേഗ സെഞ്ച്വറി നേടയിരുന്നു.
