തിരുവനന്തപുരം: സനാതനധര്‍മ്മത്തിനെതിരായ അധിക്ഷേപത്തില്‍ പ്രതിഷേധം ശക്തമാക്കി ഹിന്ദുവിശ്വാസികളും ഹൈന്ദവ സംഘടനകളും. സനാതന ധര്‍മ്മത്തിനെതിരായ ചാനല്‍ പ്രവര്‍ത്തകന്റെ അധിക്ഷേപത്തിനു പിന്നാലെ സര്‍ക്കാര്‍ പുറത്തിറക്കിയ ലോട്ടറിയിലും സതാനത ധര്‍മ്മത്തെ അധിക്ഷേപിക്കുന്ന ചിത്രം പ്രസിദ്ധീകരിച്ചത് ഹിന്ദു വിശ്വാസികള്‍ക്കിടയില്‍ വ്യാപക പ്രതിഷേധമാണ് ഉയര്‍ത്തുന്നത്.
സുവര്‍ണകേരളം എന്ന പേരില്‍ പിണറായി സര്‍ക്കാര്‍ ഇറക്കിയ ലോട്ടറി ടിക്കറ്റാണ് സനാതന ധര്‍മ്മത്തെ അധിക്ഷേപിക്കുന്ന രീതിയില്‍ പുറത്തിറക്കിയത്. ലോട്ടറി ഡിപ്പാര്‍ട്ട്‌മെന്റ് ഇറക്കിയ എസ്‌കെ 34 സീരില്‍ 2026 ജനുവരി രണ്ടിന് നറുക്കെടുക്കുന്ന ലോട്ടറി ടിക്കറ്റില്‍ ശിവലിംഗത്തിലേക്ക് ആര്‍ത്തവ രക്തം വീഴുന്ന ചിത്രം ആലേഖനം ചെയതിട്ടുള്ളത്. ഇത് ഹിന്ദുവിനെയും, ഹിന്ദുമത വിശ്വാസങ്ങളെയും അധിക്ഷേപിക്കുന്നതാണ്.
സര്‍ക്കാരിന്റെ ഈ നടപടിക്കെതിരെ വിവിധ ഹൈന്ദവ സംഘടനകള്‍ വലിയ പ്രതിഷേധവുമായി രംഗത്തുവന്നു. ഇതിനു പിന്നാലെ സനാതന ധര്‍മ്മത്തെ പകര്‍ച്ച വ്യാധി എന്ന് അധിക്ഷേപിച്ച ചാനല്‍ പ്രവര്‍ത്തകന്റെ ഫെയ്‌സ ബുക്ക് പോസ്റ്റും ഹൈന്ദവ വിശ്വാസികള്‍ക്കിടയില്‍ വലിയ പ്രതിഷേധമാണ് വിളിച്ചുവരുത്തിയത്. സനാതന ധര്‍മ്മത്തിനെതിരെ മാത്രം ഇടയ്‌ക്കിടെ ഉയരുന്ന ഇത്തരം അധിക്ഷേപങ്ങള്‍ ഹിന്ദുവിശ്വാസികള്‍ക്കിടയില്‍ പിണറായി സര്‍ക്കാരിലും സിപിഎമ്മിനെതിരെയും വലിയ പ്രതിഷേധമാണ് ഉയര്‍ത്തുന്നത്. ഇത്തരം അധിക്ഷേപങ്ങള്‍ നടത്തുന്നവര്‍ക്കെതിരെ സര്‍ക്കാര്‍ ഒരു നടപടിയും സ്വീകരിക്കാത്തതും ഹിന്ദുവിശ്വാസികള്‍ക്കിടയില്‍ സര്‍ക്കാരിനെതിരായ പ്രതിഷേധത്തിന് കാരണമാണ്.
ഇതിനിടെ സനാതന ധര്‍മ്മം പകര്‍ച്ചവ്യാധിയാണെന്ന് ആക്ഷേപിച്ച ചാനല്‍ പ്രവര്‍ത്തകനെതിരെ വിവിധ ഹൈന്ദവ സംഘടനകള്‍ രംഗത്തുവന്നു. ഇയാളുടെ രാജി ആവശ്യപ്പെട്ട് ചാനല്‍ ഓഫീസിനുമുന്നില്‍ പ്രതിഷേധ പ്രകടനങ്ങളും നടന്നു. രണ്ടുസംഭവങ്ങളിലും ഹിന്ദു വിശ്വാസികളുടെ രോഷം ശക്തമായിരിക്കുകയാണ്.
ലോട്ടറി വകുപ്പും കേരള സര്‍ക്കാരും ധനമന്ത്രിയും കേരളത്തിലെ ഹിന്ദു ജനതയോട് മാപ്പ് പറയണം എന്ന് കേരള ക്ഷേത്ര സംരക്ഷണ സമിതി ആവശ്യപ്പെട്ടിരുന്നു. ലോട്ടറി വകുപ്പിന്റെ നടപടി കോടിക്കണക്കിന് വരുന്ന ഹൈന്ദവ വിശ്വാസികളുടെ വിശ്വാസത്തെ വ്രണപ്പെടുത്തുന്നതാണെന്നും സുവര്‍ണ്ണ കേരളം ലോട്ടറി എല്ലാ ഹൈന്ദവരും ബഹിഷ്‌കരിക്കണമെന്നും ആവശ്യപ്പെട്ടു. ലോട്ടറി വകുപ്പും സര്‍ക്കാരും മാപ്പ് പറയുന്നത് വരെ ശക്തമായ പ്രതിഷേധ പരിപാടികള്‍ സംഘടിപ്പിക്കുമെന്ന് കേരള ക്ഷേത്ര സംരക്ഷണ സമിതി തിരുവനന്തപുരം മഹാനഗര്‍ ജില്ല പ്രസിഡന്റ് മുക്കംപാലമൂട് രാധാകൃഷ്ണനും ജില്ലാ സെക്രട്ടറി ശാസ്തമംഗലം അനില്‍കുമാറും പ്രസ്താവനയില്‍ ആവശ്യപ്പെട്ടു.
സനാതന ധര്‍മ്മത്തെ പകര്‍ച്ച വ്യാധി എന്ന് അധിക്ഷേപിച്ച് ഫെയ്‌സ് ബുക്ക് പോസ്റ്റ് ഇട്ട ഏഷ്യാനെറ്റ് ന്യൂസിലെ ജീവനക്കാരനെ പുറത്താക്കണമെന്ന് ആവശ്യപ്പെട്ട് ഹിന്ദു ഐക്യവേദി ഏഷ്യാനെറ്റ് ന്യൂസ് ഓഫീസിലേക്ക് പ്രതിഷേധ പ്രകടനം നടത്തി. ഈ ചാനല്‍ പ്രവര്‍ത്തകനെ അറസ്റ്റുചെയ്യണമെന്ന് ആവശ്യപ്പെട്ട് ഹിന്ദു ഐക്യവേദി സിറ്റി പോലീസ് കമ്മീഷണര്‍ക്ക് പരാതിയും നല്‍കിയിരിക്കുകയാണ്.
