വര്ക്കല: അനാചാരങ്ങളുടെ അന്ധകാരത്തില് കിടന്ന കേരളീയരെ അതില് നിന്നും മോചിപ്പിച്ച യുഗപുരുഷനാണ് ശ്രീ നാരായണ ഗുരുദേവന് എന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. ശിവഗിരി തീര്ത്ഥാടന സമ്മേളനത്തില് സംസാരിക്കുകയായിരുന്നു അദ്ദേഹം.
ശിവഗിരി തീര്ത്ഥാടനം യഥാര്ത്ഥ അര്ത്ഥത്തില് കേരളം ഏറ്റെടുത്തോ എന്നു ചോദിച്ചാല് ഇല്ല എന്നു മറുപടി പറയേണ്ടിവരും. എന്നാല് കേന്ദ്ര സംസ്ഥാന സര്ക്കാരുകള് ഈ തീര്ത്ഥാടനത്തില് പങ്കാളിയാകുന്നത് മാതൃകാപരമാണ്. തീര്ത്ഥാടനം അതിന്റെ നൂറാം വാര്ഷികത്തിലേക്ക് അടുത്തു കൊണ്ടിരിക്കുകയാണ്.
അതേപോലെ മലബാര് കലാപത്തെതുടര്ന്ന് ആലുവയില് ഗുരുദേവന് വിളിച്ചു ചേര്ത്ത സര്വ്വമത സമ്മേളനത്തിന്റെ നൂറാം വാര്ഷികവുമാണ്. ടാഗോറും, ഗാന്ധിജിയും ഗുരുദേവനെ സന്ദര്ശിച്ച പുണ്യഭൂമിയായ ശിവഗിരി തീര്ത്ഥാടനം അതില് യഥാര്ത്ഥ ഭക്തിയിലും അര്ത്ഥത്തിലും കൂടുതല് മികവുറ്റതാകണം. ഗുരുവചനങ്ങളും ആശയങ്ങളും ലോകം മുഴുവന് കൂടുതല് പ്രചരിക്കട്ടേ എന്നും വെള്ളാപ്പള്ളി പറഞ്ഞു.
