പ്യോങ്ങ് യാങ്ങ്::റഷ്യ-ഉക്രൈന്‍ യുദ്ധം നിര്‍ണ്ണായകമാകുന്ന ഘട്ടത്തില്‍ വടക്കന്‍ കൊറിയന്‍ നേതാവ് കിം ജോങ് ഉന്‍ യുഎസിനും തെക്കന്‍ കൊറിയയ്‌ക്കും ഭീഷണിയാവുന്നു. റഷ്യയുടെയും ചൈനയുടെയും അടുത്ത പങ്കാളിയായ കിം ജോങ്ങ് ഉന്‍ കഴിഞ്ഞ ദിവസം ദീര്‍ഘദൂര ക്രൂയിസ് മിസൈല്‍ പരീക്ഷിച്ചു. ആണവായുധം തൊടുക്കാവുന്ന മുങ്ങിക്കപ്പലിന്റെ നിര്‍മ്മാണം അവസാന ദശയിലാണ്.
ഇതോടെ ട്രംപിനും തെക്കന്‍ കൊറിയയ്‌ക്കും വലിയൊരു ഭീഷണിയായി മാറുകയാണ് കിം ജോങ് ഉന്‍. കഴിഞ്ഞ ദിവസം പരീക്ഷിച്ച ദീര്‍ഘദൂര ക്രൂയിസ് മിസൈലിന് അമേരിക്കയിലെ നഗരങ്ങളില്‍ വരെ ചെന്ന് പതിക്കാനുള്ള ശേഷിയുണ്ട്. രണ്ട് മണിക്കൂര്‍ നേരം വരെ വായുവില്‍ ഈ മിസൈലിന് കുതിക്കാന്‍ സാധിക്കും. അതിന് ശേഷം ലക്ഷ്യസ്ഥാനം തകര്‍ക്കും. 2000 കിലോമീറ്റര്‍ വരെയാണ് ദൂര പരിധി. അമേരിക്കയുടെ ഏത് നഗരത്തിലും ഈ മിസൈലിന് പറന്ന് ചെന്ന് സ്ഫോടനം നടത്താന്‍ കഴിയും. ഇത് അമേരിക്കയ്‌ക്കും ട്രംപിനും ഉള്ള റഷ്യയുടെ താക്കീത് തന്നെയാണെന്ന് കരുതുന്നു. റഷ്യയുടെ പങ്കാളിയായ വടക്കന്‍ കൊറിയയുടെ നേതാവ് കിം ജോങ് ഉന്‍ തന്നെയാണ് ഈ ക്രൂയിസ് മിസൈല്‍ പരീക്ഷിക്കുന്ന ചടങ്ങിന് നേതൃത്വം നല്‍കിയത്.
ഈയിടെ 8700 ടണ്‍ ഭാരമുള്ള ഒരു ആണവോര്‍ജ്ജത്തില്‍ പ്രവര്‍ത്തിക്കുന്ന മുങ്ങിക്കപ്പലിന്റെ നിര്‍മ്മാണത്തിന് കിം ജോങ് ഉന്‍ മേല്‍നോട്ടം നല്‍കുന്നതിന്റെ വീഡിയോ പുറത്ത് വന്നിരുന്നു. യുഎസിനും തെക്കന്‍ കൊറിയയ്‌ക്കും താക്കീതായാണ് ഈ മുങ്ങിക്കപ്പല്‍ നിര്‍മ്മിക്കുന്നത്. ആണവപോര്‍മുനയുള്ള മിസൈല്‍ വരെ അയയ്ക്കാന് ഈ മുങ്ങിക്കപ്പലിനാകും. കിം ജോങ്ങ് ഉന്നും മകളും ആണവോര്‍ജ്ജത്തില്‍ പ്രവര്‍ത്തിക്കുന്ന മുങ്ങിക്കപ്പലിന്റെ നിര്‍മ്മാണപ്രവര്‍ത്തനങ്ങള്‍ നേരിട്ട് കാണാന്‍ എത്തിയിരുന്നു. റഷ്യയാണ് ഈ ആണവോര്‍ജ്ജത്തില്‍ പ്രവര്‍ത്തിക്കുന്ന അന്തര്‍വാഹിനിയുടെ നിര്‍മ്മാണത്തില്‍ വടക്കന്‍ കൊറിയയെ സഹായിക്കുന്നത് എന്ന് കരുതുന്നു. ചൈനയും സാങ്കേതിക സഹായം നല്‍കുന്നു. എന്തായാലും നിര‍്ഭയനായി അറിയപ്പെടുന്ന കിം ജോങ്ങ് ഉന്നിന്റെ നീക്കങ്ങള്‍ ഭയത്തോടെയാണ് അമേരിക്ക വീക്ഷിക്കുന്നത്. ഈയിടെ ട്രെയിനില്‍ റഷ്യയിലേക്ക് പോയി പുടിനുമായി കിം ജോങ് ഉന്‍ കൂടിക്കാഴ്ച നടത്തിയിരുന്നു. ചൈനയുമായും ഷീ ജിന്‍പിങ്ങുമായും അടുത്ത ബന്ധമാണ് വടക്കന്‍ കൊറിയ പുലര്‍ത്തുന്നത്. മാത്രമല്ല, നാല് വര്‍ഷം ഉക്രൈനുമായി ഒറ്റയ്‌ക്ക് യുദ്ധം ചെയ്യുന്ന റഷ്യയ്‌ക്ക് യുദ്ധം ചെയ്യുന്നതിനായി കിം ജോങ് ഉന്‍ കൊറിയന്‍ പട്ടാളക്കാരെ അയച്ചുകൊടുത്തിരുന്നു.
2026ല്‍ പാര്‍ട്ടി കോണ്‍ഗ്രസ് നടക്കുന്നതിന് മുന്നോടിയായി നിരവധി സൈനിക പരീക്ഷണങ്ങളും സാമ്പത്തിക നടപടികളും കൈക്കൊള്ളുകയാണ് കിം ജോങ് ഉന്‍. പ്യോങ് യാങ്ങിലെ സുനാന്‍ പ്രദേശത്ത് നിന്നും നിരവധി മിസൈലുകള്‍ പറക്കുന്നത് കണ്ടതായി തെക്കന്‍ കൊറിയ അറിയിച്ചു.
