ദോഹ: ഖത്തറിലെ ദോഹയില്‍ നടക്കുന്ന ലോക ബ്ലിറ്റ്സ് ചെസ് മത്സരത്തില്‍ ലോക ഒന്നാം നമ്പര്‍ താരം മാഗ്നസ് കാള്‍സനെ തോല്‍പിച്ച് ഇന്ത്യയുടെ അര്‍ജുന്‍ എരിഗെയ്സി. തോല്‍വി സ്വീകരിക്കാനാകാതെ രോഷത്തോടെ മേശയില്‍ ഇടിച്ച് മാഗ്നസ് കാള്സന് വീണ്ടും ഒരു ചെസ് പ്രതിഭയ്‌ക്ക് ചേരാത്ത പെരുമാറ്റ രീതികൊണ്ട് ലോകത്തെ അമ്പരപ്പിച്ചിരിക്കുകയാണ്. ഇടിയുടെ ആഘാതത്തില്‍ ഒന്ന് രണ്ട് കരുക്കള്‍ തറയിലേക്ക് തെറിച്ചുവീണു. പിന്നീട് വീണ കരുക്കള്‍ നിലത്ത് നിന്നും പെറുക്കി ചെസ് ബോര്‍ഡില്‍ കാള്സന് തന്നെ വെയ്‌ക്കുന്നത് കാണാം.
ഇതിന് മുന്‍പ് മാഗ്നസ് കാള്സന് ഇന്ത്യയുടെ ഗുകേഷിനോട് തോറ്റപ്പോള്‍ മേശയില്‍ ശക്തമായി ഇടിക്കുകയും കരുക്കള്‍ നിലത്ത് ചിതറുകയും ചെയ്തിരുന്നു. അന്ന് ഇതിനെതിരെ ലോകവ്യാപകമായി വിമര്‍ശനങ്ങള്‍ ഉയര്‍ന്നിരുന്നു. ഇപ്പോള്‍ വീണ്ടും മാഗ്നസ് കാള്‍സനെതിരെ ട്രോളുകളും വിമര്‍ശനങ്ങളും വീണ്ടും ഉയരുകയാണ്.
ഒമ്പതാം റൗണ്ടിലാണ് അര്‍ജുന്‍ എരിഗെയ്സി മാഗ്നസ് കാള്‍സനെ തോല്‍പിച്ചത്. ഈ വിജയത്തോടെ അര്‍ജുന്‍ എരിഗെയ്സി 7.5 പോയിന്‍റോടെ ഒന്നാം സ്ഥാനത്തേക്കുയര്‍ന്നു. ഉസ്ബെക്കിസ്ഥാന്റെ നോഡിര്‍ബെക് അബ്ദുസത്തൊറോവിനും ഏഴര പോയിന്‍റുണ്ട്. ലോക അഞ്ചാം നമ്പര്‍ താരമാണ് ഇന്ത്യയുടെ അര്‍ജുന്‍ എരിഗെയ്സി.
മാഗ്നസ് കാള്‍സനാകട്ടെ ആറര പോയിന്‍റോടെ മൂന്നാം സ്ഥാനത്താണ്. കഴിഞ്ഞ എട്ട് തവണയായി ലോക ബ്ലിറ്റ്സ് കിരീടമണിഞ്ഞ മാഗ്നസ് കാള്സന് ഇത്തവണയും കിരീടം നേടണമെന്ന വാശിയിലായിരുന്നു. അര്‍ജുന്‍ എരിഗെയ്സി തോല്‍പിച്ചതോടെ ഈ സ്വപ്നത്തിന് തിരിച്ചടി കിട്ടികയായിരുന്നു. അത് മാഗ്നസ് കാള്സന് താങ്ങാനായില്ല.
തുടക്കം മുതലേ ആക്രമിച്ച് കളിച്ച കാള്‍സനെ അതീവശാന്തതയോടെയാണ് അര്‍ജുന്‍ എരിഗെയ്സി നേരിട്ടത്. ആദ്യം കാള്‍സന്റെ ഒരു കാലാളിനെ വെട്ടി സമ്മര്‍ദ്ദം ചെലുത്തി. പിന്നീട് ഈ അര്‍ജുന്‍ എരിഗെയ്സിയുടെ കാലാളിനെ എടുത്ത് തുല്യത പാലിച്ചെങ്കിലും, ഗെയിം അര്‍ജുന്‍ എരിഗെയ്സിക്ക് അനുകൂലമായി മാറുകയായിരുന്നു.
ഇന്ത്യയുടെ അര്‍ജുന്‍ എരിഗെയ്സിയോട് തോറ്റ മാഗ്നസ് കാള്സന് മേശയില്‍ ഇടിച്ച് അരിശം തീര്‍ക്കുന്നു:
