മുംബൈ: മുംബൈയിലെ രണ്ടാമത്തെ വിമാനത്താവളമായ നവിമുംബൈ അന്താരാഷ്‌ട്ര വിമാനത്താവളം ഇന്ന് രാജ്യത്തിന് സമര്‍പ്പിക്കും. പൂര്‍ണമായും ഡിജിറ്റൈസ് ചെയ്ത വിമാനത്താവളത്തില്‍ യാത്രക്കാര്‍ക്ക് വൈഫൈ സൗജന്യമാണ്. കുറഞ്ഞ വിലയ്‌ക്ക് ഭക്ഷണം ലഭിക്കും.
ആദ്യം രാവിലെ എട്ടു മുതല്‍ രാത്രി എട്ടുവരെയാണ് പ്രവര്‍ത്തനം. 46 സര്‍വീസുകളാണ് തുടക്കത്തില്‍. 2026 ഫെബ്രുവരി മുതല്‍ 24 മണിക്കൂറും പ്രവര്‍ത്തനം. മാര്‍ച്ചില്‍, അന്താരാഷ്‌ട്ര സര്‍വീസുകള്‍ ആരംഭിക്കും. എയര്‍ ഇന്ത്യ എക്സ്പ്രസ്, ഇന്‍ഡിഗോ, ആകാശ എന്നീ വിമാനക്കമ്പനികളാണ് സര്‍വീസുകള്‍ നടത്തുന്നത്.
സര്‍വീസുകളുടെ ബാഹുല്യംകൊണ്ട് വീര്‍പ്പുമുട്ടുന്ന മുംബൈ വിമാനത്താവളത്തിന് ആശ്വാസമാകും. ഒരു റണ്‍വേ മാത്രമുള്ള മുംബൈ വിമാനത്താവളത്തില്‍ മണിക്കൂറില്‍ 44 ടേക്ക് ഓഫുകളാണ് നടക്കുന്നത്. തിരക്കേറെയുള്ള സമയത്തെ 950 സര്‍വീസുകളില്‍ ചിലവ നവിമുംബൈ വിമാനത്താവളത്തിലേക്ക് മാറ്റും.
3700 മീറ്റര്‍ ദൈര്‍ഘ്യമുള്ള രണ്ട് സമാന്തര റണ്‍വേകളാണ് നവിമുംബൈയില്‍. ഇതില്‍ ഒരു റണ്‍വേയും ഒരു ടെര്‍മിനലുമാണ് പ്രവര്‍ത്തനം തുടങ്ങുന്നത്. 2032ല്‍ അവസാനഘട്ടം പൂര്‍ത്തിയാകും. അതോടെ നാല് ടെര്‍മിനലുകളാകും. 2018ലാണ് തറക്കല്ലിട്ടത്. 2021ലാണ് സിഡ്കോയും അദാനി എയര്‍പോര്‍ട്ട് ഹോള്‍ഡിങ് ലിമിറ്റഡും ചേര്‍ന്ന് നവിമുംബൈ ഇന്റര്‍നാഷണല്‍ എയര്‍പോര്‍ട്ട് ലിമിറ്റഡിന്റെ നിര്‍മാണം ഏറ്റെടുത്തത്.
