ധാക്ക: വെടിയേറ്റ് മരിച്ച വിദ്യാര്‍ത്ഥി നേതാവ് ഷെരീഫ് ഉസ്മാന് ഹാദിയുടെ സംസ്കാരച്ചടങ്ങിന് ശേഷം ശരിയത്ത് നിയമം നടപ്പിലാക്കണമെന്ന് ആവശ്യപ്പെട്ട് ബംഗ്ലാദേശ് പാര്‍ലമെന്‍റിലേക്ക് മാര്‍ച്ച് നടത്തി മതമൗലികവാദികള്‍. ഷെരീഫ് ഉസ്മാന് ഹാദിയുടെ സംസ്കാരച്ചടങ്ങില്‍ പങ്കെടുത്ത് ബംഗ്ലാദേശിലെ ഇടക്കാല സര്‍ക്കാരിന്റെ ചുമതലയുള്ള മുഹമ്മദ് യൂനസ് പ്രസംഗിച്ചതിന് തൊട്ടുപിന്നാലെയാണ് മതമൗലികവാദികള്‍ ബംഗ്ലാദേശ് പാര്‍മെന്‍റിലേക്ക് ശരിയത്ത് നിയമം നടപ്പിലാക്കണമെന്ന് ആവശ്യപ്പെട്ട് മാര്‍ച്ച് നടത്തിയത്.
ഇതോടെ ബംഗ്ലാദേശിലെ അരാജകത്വം എല്ലാ സീമകളും ലംഘിച്ചിരിക്കുകയാണ്. സൈന്യമാകട്ടെ ഇവര്‍ക്കെതിരെ യാതൊരു നടപടിയും എടുക്കാതെ കയ്യും കെട്ടി നില്‍ക്കുകയാണ്. ഇതിനര്‍ത്ഥം. വ്യക്തമായ ഉദ്ദേശ്യങ്ങളോടെ നടപ്പാക്കുന്ന ആസൂത്രണ പദ്ധതിയാണിതെന്നാണ്. ഫെബ്രുവരി 12ന് ബംഗ്ലാദേശില്‍ പൊതുതെരഞ്ഞെടുപ്പ് പ്രഖ്യാപിച്ചിരിക്കുകയാണ്. ഈ തെരഞ്ഞെടുപ്പിനെ അട്ടിമറിക്കാനാന്‍ മുഹമ്മദ് യൂനസും പാകിസ്ഥാനും ചേര്‍ന്ന് ആസൂത്രണം ചെയ്യുന്നതാണോ ഇപ്പോഴത്തെ കലാപം എന്നും കരുതപ്പെടുന്നുണ്ട്.
ബംഗ്ലാദേശില്‍ കലാപം നടത്തിയ വിദ്യാര്‍ത്ഥികളെ നയിച്ച ഇന്‍ക്വിലാബ് മഞ്ചിന്റെ നേതാവായ വെടിയേറ്റ് മരിച്ച ഉസ്മാന് ഹാദി. ഇദ്ദേഹം ഇന്ത്യയിലെ ഏഴ് വടക്ക് കിഴക്കന്‍ സംസ്ഥാനങ്ങളെ വെട്ടിമുറിച്ച് ബംഗ്ലാദേശുമായി കൂട്ടിച്ചേര്‍ക്കും എന്ന് ഈയിടെ പ്രസംഗിച്ചിരുന്നു. ഒപ്പം ഇന്ത്യയിലെ അരുണാചല്‍ പ്രദേശ്, അസം ഉള്‍പ്പെടെയുള്ള ഏഴ് സംസ്ഥാനങ്ങളെക്കൂടി ബംഗ്ലാദേശുമായി യോജിപ്പിച്ചുകൊണ്ടുള്ള വിശാല ബംഗ്ലാദേശ് ഭൂപടം പുറത്തുവിടുകയും ചെയ്തിരുന്നു. ഈ ഭൂപടം പുറത്തുവിട്ട് ഒരു മണിക്കൂര്‍ കഴിഞ്ഞപ്പോഴാണ് ഹാദിക്ക് വെടിയേറ്റത്. ഇത് ഇന്ത്യയുടെ മേല്‍ കുറ്റം ചാര്‍ത്താന്‍ അമേരിക്കന്‍ ഡീപ് സ്റ്റേറ്റ് ശക്തികളുടെ നിര്‍ദേശപ്രകാരം പാകിസ്ഥാന്‍ രഹസ്യ ഏജന്‍സിയായ ഐഎസ് ഐ നടത്തിയ ആക്രമണമാണെന്നാണ് കരുതപ്പെടുന്നത്.
അതുപോലെ ഷേഖ് ഹസീനയെ വിട്ടുനല്‍കണമെന്ന ആവശ്യം ബംഗ്ലാദേശില്‍ ശക്തമാക്കുന്നതിന് പിന്നിലും പാക് ഐഎസ് ഐ നീക്കമുണ്ടെന്ന് കരുതുന്നു. ഒരു ഗാര്‍മെന്‍റ് ഫാക്ടറിയിലെ തൊഴിലാളിയായ ദീപ് ദാസിനെ ഒരു സംഘം ബംഗ്ലാദേശ് വിദ്യാര്‍ത്ഥികള്‍ അടിച്ചു കൊല്ലുകയും മരത്തില്‍ കെട്ടിയിട്ട് കത്തിക്കുകയും ചെയ്തിരുന്നു. ഇതെല്ലാം ബംഗ്ലാദേശിനെതിരെ ഇന്ത്യയെ പ്രകോപിപ്പിക്കുക എന്ന ലക്ഷ്യം മുന്‍നിര്‍ത്തിയാണെന്ന് കരുതുന്നു.
