മലപ്പുറം: തിരൂര്‍ ജോയിന്റ് ആര്‍ടിഒ ഓഫീസില്‍ വിജിലന്‍സ് നടത്തിയ പരിശോധനയില്‍ പ്രവാസികള്‍ ആള്‍മാറാട്ടം നടത്തി ഡ്രൈവിംഗ് ലൈസന്‍സ് നേടിയതായി കണ്ടെത്തി. തിരൂര്‍ ജോയിന്റ് ആര്‍ടിഒയുടെ ഒത്താശയില്‍ ഇതിനായി പ്രത്യേക സംഘം പ്രവര്‍ത്തിച്ചിരുന്നു. 50,000 രൂപ വരെ വാങ്ങിയായിരുന്നു അനധികൃത ലൈസന്‍സ് നല്‍കിയിരുന്നത്.
ചില ഏജന്റുമാരും ഡ്രൈവിംഗ് സ്്കൂള്‍ ഉടമകളും ഉദ്യോഗസ്ഥരും ചേര്‍ന്നാണ് ആള്‍മാറാട്ടംവഴി ലൈസന്‍സ് നല്‍കിയിരുന്നത്. വിദേശത്ത് ഡ്രൈവിംഗ് ലൈസന്‍സ് ഉള്ളവര്‍ക്ക് ഇന്ത്യയില്‍ ലേണിംഗ് ടെസ്റ്റ് എഴുതിയാല്‍ ലൈസന്‍സ് ലഭിക്കാം. എന്നാല്‍ അപേക്ഷകര്‍ വിദേശത്തായിരിക്കെ, പകരം ആളുകളെ ലേണിംഗ് ടെസ്റ്റ് എഴുതിച്ചാണ് ലൈസന്‍സുകള്‍ നല്‍കിയിരുന്നത്.
മലപ്പുറംവിജിലന്‍സ് സി.ഐ ജ്യോതീന്ദ്രകുമാറിന്റെ നേതൃത്വത്തിലാണ് തിരൂര്‍ ജോയിന്റ് ആര്‍ടിഒ ഓഫീസില്‍ പരിശോധന നടത്തിയതും ക്രമക്കേട് കണ്ടെത്തിയതും.
