കൊച്ചി: പ്രത്യേക അന്വേഷണസംഘത്തിന്റെ എതിര്‍പ്പ് തള്ളി ശബരിമല സ്വര്‍ണക്കൊള്ള അന്വേഷിക്കാന്‍ വിജിലന്‍സ് കോടതി ഇ ഡിയോട് നിര്‍ദ്ദേശിക്കുന്നു. പ്രത്യേക അന്വേഷണ സംഘത്തിന്റെ അന്വേഷണത്തില്‍ കടുത്ത അതൃപ്തി പ്രകടിപ്പിച്ച ഹൈക്കോടതി എസ്‌ഐടി അലംഭാവം കാട്ടിയെന്നും വിമര്‍ശിക്കുന്നു.
ശങ്കരദാസ് അടക്കമുള്ളവരെപ്പറ്റി എന്തുകൊണ്ട് അന്വേഷിക്കുന്നില്ലെന്ന് ചോദിക്കുന്നു. ഒടുവില്‍ രണ്ടുപേരെക്കൂടി അടിയന്തരമായി അറസ്റ്റ് ചെയ്യേണ്ടിവരുന്നു. അതായത് കേസ് സര്‍ക്കാരിന് നിയന്ത്രണമുള്ള എസ്‌ഐടിയില്‍ നിന്ന് വഴുതിപ്പോകുന്ന അവസ്ഥ. ശങ്കരദാസ് അടക്കമുള്ളവരെ വരും ദിവസങ്ങളില്‍ അറസ്റ്റ് ചെയ്യേണ്ടിവരുമെന്നുമുറപ്പ്. കാര്യങ്ങള്‍ ഇങ്ങനെ പോയാല്‍ കടകംപള്ളി സുരേന്ദ്രന്‍ അടക്കമുള്ളവര്‍ ഉത്തരം പറയേണ്ടിവരും. മാത്രമല്ല പാര്‍ട്ടിക്കു വേണ്ടപ്പെട്ടവരായ വാസുവും പത്മകുമാറും അകത്തായെന്നു മാത്രമല്ല ജാമ്യം പോലും ലഭിക്കാതെ ജനങ്ങള്‍ക്കു മുന്നില്‍ നില്‍ക്കുകയാണ്. മുന്‍ ദേവസ്വം പ്രസിഡന്റ് പ്രശാന്തും ഏതു നിമിഷവും പിടിയിലാകുമെന്നതാണ് മറ്റൊരു കാര്യം. ഇവയെല്ലാം ഒരുവശത്ത് പാര്‍ട്ടിക്കും സര്‍ക്കാരിനും അഴിയാക്കുരുക്കാണ് തീര്‍ക്കുന്നത്.
പാരഡി ഗാനത്തില്‍ കേസ് എടുത്തത് സര്‍ക്കാരിനും പാര്‍ട്ടിക്കും വമ്പന്‍ വിനയായി മാറി. തിരിച്ചടി ഭയന്ന് ഇനി കേസ് എടുക്കേണ്ടെന്ന് സര്‍ക്കാരിന് പറയേണ്ടിവരുന്നു. അത് മറ്റൊരു തിരിച്ചടി.
തദ്ദേശ തെരഞ്ഞെടുപ്പില്‍ ശബരിമല സ്വര്‍ണക്കൊള്ള എല്‍ഡിഎഫിന് വലിയ ആഘാതമാണ് നല്‍കിയത്. അതില്‍നിന്ന് തലയൂരാന്‍ കഴിയാതെ ന്യായീകരണ ക്യാപ്‌സൂളുകള്‍ പോലും ഇറക്കാന്‍ കഴിയാതെ നില്‍ക്കുമ്പോഴാണ് കേസിലെ പുതിയ ട്വിസ്റ്റുകളും കോടതി വിധികളും. ഹൈക്കോടതി കണ്ണും കാതും കൂര്‍പ്പിച്ചിരിക്കുന്ന, അന്വേഷണത്തിന്റെ ഓരോ ഘട്ടവും കൃത്യമായ നിരീക്ഷിക്കുന്ന സ്വര്‍ണക്കൊള്ളക്കേസില്‍ വിപുലമായ അന്വേഷണവുമായി ഇനി എന്‍ഫോഴ്‌സ്‌മെന്റ് ഡയറക്ടറേറ്റ് കൂടിയിറങ്ങുമ്പോള്‍, പിണറായി സര്‍ക്കാരും സിപിഎമ്മും അക്ഷരാര്‍ഥത്തില്‍ പെട്ടിരിക്കുകയാണ്. പ്രത്യേകിച്ച് നിയമ സഭാ തെരഞ്ഞെടുപ്പിന് ഇനി വെറും അഞ്ചു മാസം കൂടി മാത്രമുള്ള സാഹചര്യത്തില്‍. തദ്ദേശ തെരഞ്ഞെടുപ്പില്‍ കണ്ടത് വെറും ട്രെയിലര്‍ ആണെന്നും ‘ഹൊറര്‍’ ചിത്രം വരാനിരിക്കുന്നതേയുള്ളുവെന്നുമാണ് രാഷ്ട്രീയ നിരീക്ഷകര്‍ പറയുന്നത്. കേസ് ഒന്നു കൂടി മുറുകുന്നതോടെ ക്യാപ്‌സൂളുകള്‍ മാത്രമല്ല അടിയന്തര ശസ്ത്രക്രിയ പോലും ഫലിക്കില്ലെന്ന അവസ്ഥയിലേക്കാണ് സിപിഎമ്മും സര്‍ക്കാരും നീങ്ങുന്നത്.
