എടവണ്ണ (മലപ്പുറം): ക്ഷേത്രത്തിലെ ഭക്തിഗാനത്തിന് വിലക്കേര്‍പ്പെടുത്താന്‍ യുഡിഎഫ് രംഗത്ത്. മലപ്പുറം എടവണ്ണ പഞ്ചായത്തിലെ ആറാം വാര്‍ഡിലെ കൊളപ്പാട് വിഷ്ണുക്ഷേത്രത്തില്‍ കാലങ്ങളായി വയ്ക്കുന്ന സുപ്രഭാതത്തിന് വിലക്കേര്‍പ്പെടുത്താനാണ് നീക്കം.
ക്ഷേത്രത്തില്‍ പോലീസ് അനുമതിയോടെ നിയമപരമായാണ് ഭക്തിഗാനം വയ്‌ക്കുന്നത്. തെരഞ്ഞെടുപ്പ് വിജയത്തിന്റെ ആഹ്ലാദപ്രകടനം ക്ഷേത്രത്തിനു മുന്നിലെത്തിയപ്പോഴാണ് പാട്ട് വിലക്കണമെന്നാവശ്യപ്പെട്ട് യുഡിഎഫ് സംഘം മുദ്രാവാക്യമുയര്‍ത്തിയത്.
എന്നാല്‍ പ്രദേശത്തെ ഇതര മതസ്ഥാപനങ്ങളില്‍ ഉച്ചത്തില്‍ വയ്ക്കുന്ന മൈക്ക് അനൗണ്‍സ്‌മെന്റുകള്‍ക്കോ മറ്റോ യാതൊരെതിര്‍പ്പും ഇല്ല. എടവണ്ണ പഞ്ചായത്തില്‍ ആറാം വാര്‍ഡിലാണ് കൊളപ്പാട് വിഷ്ണുക്ഷേത്രം സ്ഥിതിചെയ്യുന്നത്. . കേരള ക്ഷേത്രസംരക്ഷണ സമിതിയുടെ കീഴിലുള്ള ക്ഷേത്രമാണിത്.
അപകടകരമായ സന്ദേശമാണ് യുഡിഎഫിന്റെ നടപടി നല്‍കുന്നതെന്ന് ഹിന്ദു ഐക്യവേദി മുഖ്യരക്ഷാധികാരി ശശികല ടീച്ചര്‍ കുറ്റപ്പെടുത്തി. സംഭവത്തില്‍ ഭക്തജനങ്ങള്‍ കടുത്ത പ്രതിഷേധം രേഖപ്പെടുത്തി.
