മുംബൈ ; പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ തന്നെ 2029 ലെ ലോക്സഭാ തിരഞ്ഞെടുപ്പിൽ എൻഡിഎ മത്സരിക്കുമെന്ന് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് . പ്രധാനമന്ത്രി സ്ഥാനത്തേയ്ക്ക് മറ്റൊരു ചോയിസിന് പോലും ഇട നൽകാനാകാത്ത വിധമാണ് നരേന്ദ്രമോദി രാജ്യത്തിന് വേണ്ടിയുള്ള പ്രവർത്തനങ്ങൾ നടത്തുന്നതെന്നും ഫഡ്നാവിസ് പറഞ്ഞു.
“മറ്റാരെയും കുറിച്ച് ചിന്തിക്കേണ്ട ആവശ്യമില്ല” എൻഡിടിവി മറാത്തി മഞ്ച് സംഘടിപ്പിച്ച “അൺസ്റ്റോപ്പബിൾ മഹാരാഷ്ട്ര” കോൺക്ലേവിൽ അദ്ദേഹം പറഞ്ഞു.
‘ പ്രധാനമന്ത്രി മോദി ശാരീരികമായി വളരെ ഫിറ്റ്നസാണ്; അദ്ദേഹം 40 വയസ്സുള്ള ഒരാളേക്കാൾ കഠിനാധ്വാനം ചെയ്യുന്നു. ഒരു ദിവസം 17 മണിക്കൂറിലധികം അദ്ദേഹംപ്രവർത്തിക്കുന്നു, ശാരീരികമായും മാനസികമായും ഫിറ്റ്നസായി തുടരുന്നിടത്തോളം, അദ്ദേഹത്തിന് അപ്പുറത്തേക്ക് നോക്കേണ്ട കാര്യമില്ല. 2029 ലും അദ്ദേഹം ഞങ്ങളുടെ നേതാവായിരിക്കും,” അദ്ദേഹം കൂട്ടിച്ചേർത്തു.
കോൺഗ്രസ് നേതാവും മുൻ മുഖ്യമന്ത്രിയുമായ പൃഥ്വിരാജ് ചവാന്റെ പ്രകോപനപരമായ പ്രസ്താവനയ്ക്കുള്ള ശക്തമായ മറുപടിയായാണ് ഫഡ്നാവിസിന്റെ പരാമർശങ്ങൾ.
കഴിഞ്ഞ ആഴ്ച നടന്ന ഒരു പത്രസമ്മേളനത്തിൽ, ആഗോള രാഷ്ട്രീയ സംഭവവികാസങ്ങളെക്കുറിച്ച് ചവാൻ അഭിപ്രായപ്പെടുകയും എപ്സ്റ്റീൻ ഫയലുകളെച്ചൊല്ലി കഴിഞ്ഞ ആറ് മാസമായി അമേരിക്കയിൽ ഉണ്ടായ പ്രക്ഷുബ്ധതയെക്കുറിച്ച് പരാമർശിക്കുകയും ചെയ്തിരുന്നു.
ആ രേഖകളുടെ പൂർണ്ണ വിവരങ്ങൾ വെളിപ്പെടുത്തിയാൽ, അവയുടെ പ്രത്യാഘാതങ്ങൾ ഇന്ത്യൻ രാഷ്ട്രീയത്തിലേക്കും വ്യാപിക്കുമെന്നും, ഒരു മറാത്തി വ്യക്തി പ്രധാനമന്ത്രിയാകാനുള്ള സാധ്യത പോലും സൃഷ്ടിക്കുമെന്നും ചവാൻ അഭിപ്രായപ്പെട്ടിരുന്നു.
