പാലക്കാട് : വണ്ടാഴിയില് യുഡിഎഫ് സ്ഥാനാര്ത്ഥിയെ വീടുകയറി അക്രമിച്ചെന്ന പരാതിയില് സിപിഎം പ്രവര്ത്തകര്ക്കെതിരെ കേസെടുത്തു.വണ്ടാഴി പഞ്ചായത്ത് കിഴക്കേത്തറ പതിനൊന്നാം വാര്ഡിലെ യുഡിഎഫ് സ്ഥാനാര്ത്ഥി സജിത വിപിനെ ആക്രമിച്ചെന്ന് പരാതി. വ്യാഴാഴ്ച രാവിലെ പത്തുമണിയോടെയാണ് സംഭവം.
സജിതയുടെ ഭര്ത്താവ് വിപിനും സജിതയുടെ അമ്മ പങ്കജത്തിനും 11 മാസം പ്രായമുള്ള കുഞ്ഞിനും പരിക്കേറ്റു. മംഗലംഡാമിലെ സിപിഎം പ്രവര്ത്തകരായ സുബിന്, രോഹിത്, ഇബ്നു സെയ്ദ് എന്നിവരാണ് പ്രതികള്.
മൂന്നു പ്രതികളും മാരകായുധങ്ങളുമായി വീട്ടില് കയറി അതിക്രമം നടത്തി. വീട്ടില് കയറി സ്ത്രീകളെ അക്രമിച്ചു,കൊല്ലുമെന്ന് ഭീഷണിപ്പെടുത്തി,കുഞ്ഞിന്റെ കഴുത്തിലെ മാല മോഷ്ടിച്ചെന്നും എഫ് ഐ ആറില് പറയുന്നു.
ബൂത്തിലേക്ക് വരുന്ന വോട്ടര്മാര്ക്ക് ബൂത്ത് നമ്പറും മറ്റും പറഞ്ഞു കൊടുക്കുന്നതിനായി സ്ഥാനാര്ത്ഥിയും പ്രവര്ത്തകരും നില്ക്കുന്നതിനെ ചൊല്ലി സിപിഎം പ്രവര്ത്തകരും യുഡിഎഫ് പ്രവര്ത്തകരും തമ്മില് വാക്കേറ്റമുണ്ടായി. ഇതിന് പിന്നാലെ വീട്ടിലെത്തി ആക്രമിച്ചെന്നാണ് പരാതി.
